Xitay hökümiti bu yilqi hej tawabchilirigha “Iz qoghlighuch” ornatmaqchi

Muxbirimiz eziz
2018-07-31
Share

Islam dinigha étiqad qilidighan Uyghurlar üchün bekmu muhim bolghan hej pa'aliyetliri her yili xitay hökümitining qattiq kontrolluqi astida tamamlinip kelgenliki melum. Yéqinda bu yilqi hej pa'aliyiti üchün hajilargha ularning éniq ornini körsitip béridighan “Iz qoghlighuch” apparati ornitilidighanliqi diqqet qozghidi.

Xitay hökümiti bashqurushidiki “Yer shari waqti” gézitining 31-iyuldiki xewiride éytilishiche, bu yilqi hej tawabchilirigha alahide layihilen'gen “Iz qoghlighuch” eswabi ésip qoyulidiken. Ikkilik kod chaplan'ghan bu eswabqa shu kishining resimi we bashqa tepsiliy uchurliri kirgüzülgen iken. Melum bolushiche, bu yilqi hej pa'aliyiti üchün 3300 hajigha mushu xildiki eswab ésip qoyulidiken. Emma xewerde bu kishilerning millet teweliki éytilmighan. Xitay islam jem'iyitidin bireylen bu heqte söz qilip: “Bu yéngi eswab hajilirimizning bixeterliki üchün bekmu muhim. Chünki biz bu arqiliq hajilirimizning konkrét ornini herqachan bileleymiz” dégen.

Türlük uchurlardin melum bolushiche, yillardin buyan hejge barghan Uyghurlar xitay hökümiti seplep qoyghan “Alahide xadimlar” ning qattiq nazariti astida hej pa'aliyetlirini tamam qilip kelgen, shuningdek ularning hej pa'aliyiti jeryanida chet'ellerdiki Uyghurlar bilen alaqide bolushi qattiq cheklinip kelgen. Emdilikte bu xil yéngi usulning qollinilishi bir qisim pa'aliyetchilerning gumanini qozghawatqanliqi melum. 

En'gliyediki king uniwérsitétining proféssori éwa pils bu heqte “Wal-strét zhurnili” gézitige söz qilip: “Bu xitay hökümitining musulmanlargha ziyankeshlik qilishining yene bir ispati. Bu usul emeliyette türmilerdiki jinayetchilerge qollinilidu” dégen. Gérmaniyelik mutexessislerdin adryan zénz bolsa hejge iltimas qilghuchilarning qattiq tallashtin ötidighanliqini tekitligech: “Mushundaq turupmu bu xitay hökümitining ashu hajilardin xatirjem bolalmaywatqanliqini körsitidu” dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet