Хитайниң «ишләпчиқириш қурулуш армийәси» һәрбий күчини ашурмақчи

Мухбиримиз шөһрәт һошур
2017-09-19
Елхәт
Пикир
Share
Принт

Хитайниң уйғур дияридики «шинҗаң ишләпчиқириш-қурулуш армийәси» дәп атилип келиватқан, әмма көзәткүчиләр тәрипидин «йерим армийә» дәп атиливатқан оргини өзиниң һәрбий күчини йәнә ашурмақчи.

«Ишләпчиқириш қурулуш армийәси» партикоминиң секритари сүн җиңлоң бүгүн бу һәқтики бир баянлирида мәзкур қошунниң биринчи вәзиписиниң чегра вә муқимлиқни қоғдаш икәнликини тәкитлигән. Ши җинңиңниң уйғур районида әбәдий әминликни бәрпа қилиштин ибарәт истратегийәлик баш нишанини әмәлгә ашурушта мәзкур «ишләпчиқириш-қурулуш армийиси» гә пәвқуладдә вәзипә чүшидиғанлиқини тәкитлигән.

«Ишләпчиқириш қурулуш армийәси» ниң һәрбий күчини вә һәрбий характерини ашурушни «бу пәвқуладдә вәзипини ишқа ашуруштики ачқуч» дәп тәриплигән сүн җиңлоң, мәзкур «армийә»ниң һәрбий мәшиқләрни күчәйтидиғанлиқини вә униң тәркибидики маарип вә сәһийә саһәсиниму муқимлиққа хизмәт қилдуридиғанлиқини ейтқан.

Хитайниң «хәлқ гезити»ниң бүгүнки бу һәқтики обзорида баян қилинишичә, мәзкур «армийә» буниңдин кейин қош тил маарипини йолға қоюп, йәрликтин 74400 оқуғучи қобул қилидикән.

Муһаҗирәттики уйғур көзәткүчиләр хитайниң уйғур райондики һәр саһә әмәлдарлириниң шоар вә чақириқлиридики өзгиришләргә изчил һалда диққәт қилип кәлмәктә. Америкада яшаватқан сиясий көзәткүчи учқунҗан әпәнди, сүн җиңлоңниң юқириқи «ишләпчиқириш қурулуш армийәси» ниң муқимлиқни қоғдаш ролини күчәйтиш чақириқини «хитай даирилириниң райондики һакимийитиниң мустәмликичилик тәбиитини ялиңач һалда оттуриға қоюши» дәп баһа бәрди.

Пикирләр (0)
Share
Толуқ бәт