Andriyan zénz: "Uyghur élidiki xitay qoralliq saqchilirining rasxoti élan qilin'ghan sandin köp yuqiri"

Muxbirimiz irade
2018-04-25
Élxet
Pikir
Share
Print

Mutexessisler Uyghur élidiki xitay qoralliq saqchi qisimlirining yilliq rasxotining élan qilin'ghan sandin köp yuqiriliqini we buning hemmisining dégüdek xitay merkizi hökümiti teripidin teminliniwatqanliqini bildürdi.

Bügün gérmaniyelik tetqiqatchi adriyan zénzning bu heqtiki tetqiqat maqalisi "Jeymis town fondi" ning tor bétide élan qilindi. Adriyan zénz Uyghur élida turushluq xitay qoralliq saqchi qisimliri we uning qarmiqidiki "Ichki bixeterlik qoshunliri" gha a'it élan qilin'ghan sanliq melumatlarni sélishturush arqiliq Uyghur élidiki "Ichki bixeterlik qoshunliri" we ularning rasxotlirini hésablap chiqqan.

Uning körsitishiche, Uyghur élida nöwette peqetla "Ichki bixeterlik qoshuni" gha tewe bolghan 80 mingdin 160 mingghiche qoralliq küch bar, dep perez qilishqa bolidiken. U, xitay merkizi hökümitining xitay qoralliq saqchi qisimlirigha ajratqan meblighining 80 pirsentini "Ichki bixeterlik qoshunliri" gha ajritilidighanliqini nuqta qilip hésablighanda, 2016-yili ichide xitay merkizi hökümitining Uyghur élidiki qoralliq saqchi qisimlirini 10-20 milyard yüen meblegh bilen teminligenlikini eskertken.

U, Uyghur aptonom rayonluq hökümetning Uyghur élida turushluq qoshunlargha ajratqan rasxotigha asasen bu qoshunlar rasxotining 93-96 pirsentining pütünley merkizi hökümet teripidin teminlinip kelgenlikini ilgiri sürgen.

Adrdiyan zénzning qarishiche, yuqiriqi ehwal tebi'iy halda Uyghur élidiki qoralliq qisimlarning biwasite halda merkizi hökümet teripidin bashqurulushi, yerlik hökümetning rayondiki qoralliq saqchi küchlirini kontrol qilish hoquqining bolmasliqtek bir ehwalgha yol achidiken. U, bashqa ölkilerde xitay qoralliq saqchi qisimlirining keng kölemlik jiddiy ehwal bolmighan ehwal astida asasen arqa pilanda turidighanliqini, emma Uyghur élida bolsa adettiki yerlik saqchi organliri hel qilidighan mesililerdimu biwasite halda qoralliq saqchi qisimlirining otturigha chüshidighanliqini tekitlep ötken.

U, Uyghur élidiki bu ehwalni xitay dölet re'isi shi jinpingning armiyede élip bériwatqan islahati bilenmu munasiwetlik dep körsitip, uning bu arqiliq bara-bara yerlik hökümetlerning hoquq küchini ajizlashturuwatqanliqini bildürgen.

Toluq bet