Qurban héyt namizi xitay dölet bayriqini chiqirish murasimidin kéyin oqulidiken

Muxbirimiz qutlan
2017.08.30

Bu yilliq qurban héyt yétip kélish aldida xitay da'irilirining ürümchidiki meschitlerge qaratqan nazaritining hessilep kücheygenliki melum bolmaqta.

28-Awghust küni ürümchi shehiridiki tungganlarning eng chong meschiti bolghan shenshi jamesi qurban héytliq uqturush chiqirip, bu yilliq qurban héyt namizi bashlinishtin burun namazxanlarning birdek jame qorusida ötküzülidighan xitay dölet bayriqini chiqirish murasimigha qatnishidighanliqini bildürgen.

Mezkur uqturush ijtima'iy taratqularda ashkarilan'ghandin kéyin, muhajirettiki Uyghur we tunggan jama'iti arisida küchlük inkas peyda qildi.

Ürümchidiki shenshi jamesi meschit da'imiy hey'iti namidin chiqirilghan uqturushta mundaq déyilgen: “Bu yilliq qurban héyt namizi 9-ayning 1-küni oqulidu. Etigen sa'et 8:00 de dölet bayriqi chiqirish murasimi ötküzülidu. Sa'et 8:30 de héyt namizi bashlinip 9:00 da axirlishidu. Waqip bolghaysiler.”

Ürümchidiki shenshi jamesi tengritagh rayonining nenmén, yeni jenubiy qowuqtiki tungganlar mehellisige jaylashqan bolup, 1906-yili qurulghan iken.

Közetküchiler, bu ehwal xitay hökümitining Uyghur diyaridiki meschitlirige qaritilghan yuqiri bésimliq siyasiy teqipning zadi qaysi derijige yetkenlikidin bésharet béridu, dep qarimaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.