“Héytgah meydanidiki héytliq tentene” ning xitayning bir meydan oyuni ikenliki melum bolmaqta

Muxbirimiz jewlan
2022-05-04
Share

Melum bolushiche, Uyghur diyarida roza héyt dep békitilgen 3-may küni xitay hökümiti Uyghurlarni seperwer qilip, ularni meschitlerge bérishqa, “Daghdughiliq héyt ötküzüsh” ke orunlashturghan. Shu küni qeshqer héytgah jamesining aldida tentene qiliwatqan nechche minglighan Uyghur yashlirining widiyosi fésbok, tiwittérlarda keng tarqalghan bolup, widiyodiki “Qaynam-tashqinliq keypiyat” we ademlerning köplüki bezi insanlarda Uyghurlarning hazirqi éghir weziyitige qarita türlük gumanlarni peyda qilmaqtiken.

Siyasiy közetchi ilshat hesen özining tiwéttir hésabida bu widiyo heqqide baha bérip mundaq yazghan: “Widiyogha obdan qarisaq, bu yerde chachliri oxshash yasalghan yashlarning sama oynimay, közlirini ghelite oynitip, uyaq-buyaqqa hangwéqip kalangpayliship yürgenlikini körimiz. Démek, birleshken döletler teshkilati kishilik hoquq aliy komissari sherqiy türkistan'gha barmay turupla, xitayning bir meydan oyuni bashlinip ketken gep! eger aliy komissarning ziyariti emelge éship qalsa, uning köridighini ussul oynap, naxsha éytip partiye bilen hökümetke rehmet éytidighan Uyghurlar bolidu, xalas!”

Bashqa tehlilchilerning qarishiche, bu widiyogha “Shinjangdiki her millet xelqi roza héytni tebriklimekte” dégen xetning qisturulushi we xelq'ara taratqularda keng tarqilishi, xitayning buni teshwiqat üchün meqsetlik qiliwatqanliqini éniq körsitip béridiken.

Muxbirimizning éniqlishigha qarighanda, héytgah aldidiki bu pa'aliyetke adem toplashni yerlik ahaliler komitéti orunlashturghan bolup, barghanlargha 100 somdin 150 somghiche pul tarqatqan؛ barghanlar ichide yashlar köp sanliqni teshkil qilghan. Keypiyatning qarimaqqa jushqun körünüshi Uyghurlarning héyt tentenisini séghinishi hem ahaliler komitétidikilerning teshwiq-terghibati bilen munasiwetlik iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet