Һиндонезийә қолға елинған төт уйғурни хитайға қайтурмайдиғанлиқини билдүрди

Мухбиримиз әзиз
2016.04.22

Б б с ниң 22-апрелдики хитайчә хәвиригә қариғанда, һиндонезийә һөкүмити “террорчи тәшкилат билән алақиси бар” дәп қолға алған төт уйғурни хитайға қайтурмайдиғанлиқини рәсмий җакарлиған.

Мәлум болушичә, хитай һөкүмити өзлири қолға алған һиндонезийәлик бир җинайәт гумандарини бу төт уйғур тутқун билән алмаштурушни тәләп қиливатқан икән. Хәвәрдә ейтилишичә, самадикун исимлик бу һиндонезийәлик 2003-йили хиянәтчилик қилмиши паш болуп қалғандин кейин чәтәлгә қечип кәткән вә өткән һәптә шаңхәйдә тутулуп қалған икән.

Һиндонезийә тәрәп б б с ниң мухбириға һиндонезийә билән хитай оттурисида мәһбус алмаштуруш келишими йоқлуқини, йәнә келип бу кишиләрниң делоси охшаш болмиған категорийигә мәнсуплуқини билдүргән.

Хәвәрдә ейтилишичә, хитай тәрәп самадикунни һиндонезийгә өткүзүп беришкә мақул болған. Буниң бәдилигә һиндонезийә һөкүмити хитай сақчилириниң һиндонезийә түрмисигә берип бу төт уйғурни сорақ қилишиға иҗазәт бәргән.

Исмини ашкарилашни халимиған бир һиндонезийә әмәлдари әркин асия радийосиниң мухбирлириға бу һәқтә йәниму илгириләп мәлумат берип, бу төт уйғур хитайға қайтурулса уларниң өлүм хәвпигә дуч келидиғанлиқини тәкитлигән. У бу һәқтә тохтилип “уларни хитайға қайтуруш уларни өлтүрүвәткәнгә баравәр. Улар хитайға елип берилса шу заматла етип ташлиниду” дегән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.