“вашингтон почтиси” тәһрирати американиң Hikvision ни җазалашқа тәйярлиниватқанлиқини қарши алған

Мухбиримиз ирадә
2022-05-12
Share

Америкадики нопузлуқ гезитләрдин болған “вашингтон почтиси” гезити мәхсус тәһрират мақалиси елан қилған. Мақалидә американиң хитайниң көзитиш камераси ширкити Hikvision ни җазалаш қарарини қарши елип, уни “тәһдиткә қайтурулған зөрүр инкас” дәп баһалиған.

Йеқинда “малийә вақти гезити” ишәнчлик мәнбәләрдин игилигән учуриға асасән, америка малийә министирлиқиниң Hikvision шеркитини җазалашқа тәйярлиниватқанлиқини хәвәр қилған иди. Мәлум болушичә, Hikvision ширкити американиң “дөләтлик алаһидә бәлгиләнгәнләр тизимлики” ((SDN гә киргүзүлидиған болуп, бу тизимликтики ширкәтләр билән һәрқандақ америка ширкити яки пуқралириниң алақә қилиши чәклинидикән, бу ширкәтләрниң америкадики мал-мүлүклири тоңлитилидикән.

“вашингтон почтиси” гезитиниң тәһрират мақалисидә бу җаза һәққидә мундақ дейилгән: “бу күнләрдә, хитай муәссәсәлирини җазалаш көпийиватиду. Әмма һазирға қәдәр қоюлған җазаларниң һечқайсиси бундақ чишлиқ болуп бақмиған. SDN Тизимликигә киргүзүлгәнлик, һәр қандақ бир ширкәткә қаритилған әң қаттиқ җаза һесаблиниду. Җазаниң қандақ йолға қоюлушиға асасән, америка Hikvision билән алақиси болған вә америкиниң қанун системиси билән мәлум мунасивити бар һәр қандақ адәмгә, һәр қандақ орунға җаза бериш арқилиқ, уни дуняниң һәммә йеридә иҗра қилалайду.”

“вашингтон почтиси” йәнә мақалисдә хитайниң Hikvision ширкитигә берилгән бу җазаниң интайин адил вә һәқлиқ җаза болғанлиқини тәкитлигәндә, бу ширкәтниң хитай һөкүмитиниң дуняға қолини созушиға актип маслашқан, униң уйғурларға қаратқан қирғинчилиқини қолайлаштурған, һәтта мәхсус уйғурларни байқайдиған әқлий иқтидарлиқ камераларни ясап базарға салған, хитайниң назарәт вә тәқибләш асасидики мустәбит тузүмини африқа, оттура-шәрқ дөләтлири һакимийәтлиригә өгитиш вә екиспорт қилишта зор рол ойниған бир рәзил нийәтлик ширкәт икәнликини тәпсили баян қилған.

Мақалидә йәнә хитай һөкүмитигә санлиқ мәлумат йиғидиған бу ширкәтниң та йеқинғичә америка һөкүмәт органлири вә дөләт мәҗлисидә ишлитилгәнлики, һазирғичә әнгилийәниң лондон вә башқа чоң шәһәрлиридә Hikvision камералири ишлитилидиғанлиқини, бу камералардики бихәтәрлик йочуқини нәзәрдә тутқанда, буниң интайин әндишилинәрлик бир әһваллиқини билдургән.

“вашингтон почтиси” гезитиниң мәзкур тәһрират мақалисидә, Hikvision ширкитиниң заманиви мустәбитликниң пәллисидә туруватқанлиқини, шуңа бундақ тәһдит пәйда қиливатқан ширкәтни җазалашниң интайин бир тоғра һәрикәт болғанлиқи һәққидә хуласә характерлиқ баян берилгән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт