“Washin'gton pochtisi” tehrirati amérikaning Hikvision ni jazalashqa teyyarliniwatqanliqini qarshi alghan

Muxbirimiz irade
2022.05.12
Share on WhatsApp
Share on WhatsApp

Amérikadiki nopuzluq gézitlerdin bolghan “Washin'gton pochtisi” géziti mexsus tehrirat maqalisi élan qilghan. Maqalide amérikaning xitayning közitish kamérasi shirkiti Hikvision ni jazalash qararini qarshi élip, uni “Tehditke qayturulghan zörür inkas” dep bahalighan.

Yéqinda “Maliye waqti géziti” ishenchlik menbelerdin igiligen uchurigha asasen, amérika maliye ministirliqining Hikvision shérkitini jazalashqa teyyarliniwatqanliqini xewer qilghan idi. Melum bolushiche, Hikvision shirkiti amérikaning “Döletlik alahide belgilen'genler tizimliki” ((SDN ge kirgüzülidighan bolup, bu tizimliktiki shirketler bilen herqandaq amérika shirkiti yaki puqralirining alaqe qilishi cheklinidiken, bu shirketlerning amérikadiki mal-mülükliri tonglitilidiken.

“Washin'gton pochtisi” gézitining tehrirat maqaliside bu jaza heqqide mundaq déyilgen: “Bu künlerde, xitay mu'esseselirini jazalash köpiyiwatidu. Emma hazirgha qeder qoyulghan jazalarning héchqaysisi bundaq chishliq bolup baqmighan. SDN Tizimlikige kirgüzülgenlik, her qandaq bir shirketke qaritilghan eng qattiq jaza hésablinidu. Jazaning qandaq yolgha qoyulushigha asasen, amérika Hikvision bilen alaqisi bolghan we amérikining qanun sistémisi bilen melum munasiwiti bar her qandaq ademge, her qandaq orun'gha jaza bérish arqiliq, uni dunyaning hemme yéride ijra qilalaydu.”

“Washin'gton pochtisi” yene maqalisde xitayning Hikvision shirkitige bérilgen bu jazaning intayin adil we heqliq jaza bolghanliqini tekitligende, bu shirketning xitay hökümitining dunyagha qolini sozushigha aktip maslashqan, uning Uyghurlargha qaratqan qirghinchiliqini qolaylashturghan, hetta mexsus Uyghurlarni bayqaydighan eqliy iqtidarliq kaméralarni yasap bazargha salghan, xitayning nazaret we teqiblesh asasidiki mustebit tuzümini afriqa, ottura-sherq döletliri hakimiyetlirige ögitish we ékisport qilishta zor rol oynighan bir rezil niyetlik shirket ikenlikini tepsili bayan qilghan.

Maqalide yene xitay hökümitige sanliq melumat yighidighan bu shirketning ta yéqin'ghiche amérika hökümet organliri we dölet mejliside ishlitilgenliki, hazirghiche en'giliyening london we bashqa chong sheherliride Hikvision kaméraliri ishlitilidighanliqini, bu kaméralardiki bixeterlik yochuqini nezerde tutqanda, buning intayin endishilinerlik bir ehwalliqini bildurgen.

“Washin'gton pochtisi” gézitining mezkur tehrirat maqaliside, Hikvision shirkitining zamaniwi mustebitlikning pelliside turuwatqanliqini, shunga bundaq tehdit peyda qiliwatqan shirketni jazalashning intayin bir toghra heriket bolghanliqi heqqide xulase xaraktérliq bayan bérilgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.