Xitayning “Hikvision” shirkitining Uyghurlarni basturushtiki roli yenimu éniq ashkarilan'ghan

Muxbirimiz irade
2022.06.16
Share on WhatsApp
Share on WhatsApp

Xitayning közitish kaméra shirkiti bolghan “Hikvision” ning xitay hökümitining Uyghurlargha qaritiwatqan basturush siyasiti bilen biwaste munasiwiti barliqi yenimu ilgiriligen halda ispatlan'ghan.

Dunyadiki nazaret kaméra sistémiliri üstide tetqiqat élip baridighan “IPVM” tetqiqat shirkiti 14-iyun küni yéqinda ashkarilan'ghan “Shinjang saqchi höjjetliri” diki sanliq melumatlarni tetqiq qilish asasida bir yéngi doklat teyyarlap chiqqan bolup, ular “Hikvision” shirkiti kaméralirining tartqan körünüshlirining bezi Uyghurlarning qolgha élinishini keltürüp chiqarghanliqini bayqighan. Ular bu söretlerni tartqan kaméralarning nomurlirighiche éniqlighan iken.

Doklatta körsitilishiche, “Hikvision” kamérasi bir Uyghur er kishi heydewatqan aptomobilning resimini tartqandin kéyin, u aptomobilning nomur taxtisidiki nomur aptomatik halda Uyghur élidiki saqchi sanliq melumat ambirigha ewetilip sélishturulup kimliki éniqlap chiqilghan we netijide aptomatik halda bu kishini “Derhal qolgha élish” belgisi chiqirilghan. Bu kishi chet el bilen munasiwetlik, dep qaralghanliqi üchün qolgha élish belgisi chiqirilghan iken.

Doklatta körsitishiche, shinjang saqchi terep 2018-yilgha a'it ichki höjjetlerdila Uyghur élidiki 23 milyon ahalining uchurlirining sanliq melumat ambirigha kirgüzüp bolun'ghanliqini qeyt qilghan iken. Bu sanliq melumatlar atalmish “Bir gewdileshken birleshme urush supisi” (IJOP) gha ulan'ghan bolup, aptomatik halda shexslerge da'ir barliq uchurlarni toplap, shuninggha asasen “Xewplik” kishilerge belge qoyup mangidiken. Bash shtab bolsa mushu uchurlargha asasen kimni tutqun qilishni buyruydiken.

“Aksiyos” xewerlirining éytishiche, Hikvision buningdin ilgiri öz kamérasining Uyghurlarni basturushta qollinilghanliqidek xewerlerni ret qilip kelgen bolsimu, bu yéngi doklat chiqqandin kéyin bir inkas bermigen. Amérikadiki xitay elchixanisimu jawab bermigen.

Amérika maliye ministirliqi 2021-yili bu shirketni “Qara tizimlik” ke kirgüzgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet