Hilari kilintonning 5 neper ayal pa'aliyetchini qoyup bérish telipi xitayni narazi qildi

Muxbirimiz méhriban
2015-04-07
Élxet
Pikir
Share
Print

Amérikining sabiq dölet ishliri ministiri hilari kilinton seyshenbe küni twitér torida bayanat élan qilip, xitaydin bu yil 8-mart harpisida tutqun qilin'ghan 5 neper ayal pa'aliyetchini qoyup bérishni telep qildi.

Hilari kilinton bayanatida, nyuyork waqti gézitining 6-aprél düshenbe künidiki xewiridin neqil élip,"Xitay ayallar hoquqi pa'aliyetchilirini basturmasliqi kérek" dégen.

Bu yil 8-mart harpisida li tingting, wéy tingting, wang men, jéng churen, wu rungrung isimlik besh neper ayal "Ayallargha qarita jinsi tajawuzchiliqni toxtitish"ni telep qilip namayish qilghanliqi üchün, béyjing saqchiliri teripidin tutqun qilin'ghan. Xewerlerdin melum bolushiche, ular tutqun qilinip bir ay bolghan bolsimu qoyup bérilmigen. Tutqun qilin'ghan 5 ayaldin li tingtingning adwokati yén shin seyshenbe küni radi'oyimizning ziyaritini qobul qilip, "Nöwette, béyjing saqchilirining bu 5 ayalni resmiy qolgha élishni telep qilip, teptish idarisige doklat sun'ghanliqini, li tingting qatarliqlarning öz ishining toghriliqini bildürüp, béshigha kélish éhtimali bolghan herqandaq ehwalgha teyyar ikenlikini bildürgenliki" ni bayan qildi.

Roytérs agéntliqining 7-aprél seyshenbe künidiki xewiridin melum bolushiche, xitay tashqi ishlar bayanatchisi xu'a chünying seyshenbe küni naraziliq bayanati bérip,"Junggo qanun döliti, munasiwetlik tarmaqlar hazir bu mesilini tekshürüwatidu. Junggo hökümiti herqandaq dölet yaki jama'et erbablirining junggoning edliye qanun orunlirining hoquqi we musteqil qarar chiqirishigha hörmet qilishini telep qilimiz" dégen.

Toluq bet