Hindistan armiyesi shimaliy qomandanliq qismining qomandani Uyghur élide resmiy ziyarette bolmaqtiken

Muxbirimiz irade
2020-01-09
Share

“Hindistan waqti géziti” ning xewer qilishiche, hindistan armiyesi shimaliy qomandanliq qismining qomandani létinant général ranbir sing 9-yanwar peyshenbe küni resmiy ziyaret üchün Uyghur rayonigha yétip kelgen. Uning jüme küni xitay xelq armiyesining Uyghur élide turushluq qisimliri qomandani bilen körüshüp, herbiy bazilarni ziyaret qilidighanliqi texmin qilinmaqtiken.

“Hindistan waqti géziti” ning xewiride xitay hökümitining shinjang Uyghur aptonom rayonigha qaritilghan ziyaretlerni nahayiti qattiq qamal qilidighanliqi, bu jehettin alghanda hindistan géniralining bu ziyaritining nahayiti az uchraydighan bir ziyaret ikenlikini bayan qilghan. Xewerde éytilishiche, hindistan armiyesi shimaliy qomandanliq qismining qomandani général létinant ranbirning Uyghur élidiki ziyaritining meqsiti éniq emes iken. Bu heqte téxi bir bayanat bérilmigen.

Melum bolushiche, hindistanliq général Uyghur élige yétip kélishtin burun chéngdudiki xitay quruqluq armiyesining gherbiy-shimal qomandanliq merkizini ziyaret qilghan we u yerde qomandan général jawzongchi bilen uchrashqan bolup, xewerde “Bu qomandanliq merkizining Uyghur éli we tibettiki qomandanliq qisimlirini bashquridighanliqi” alahide eskertilgen.

Hindistan armiyesi shimaliy qomandanliq qismining qomandani létinant général ranbir sing xitay quruqluq armiyesining qomandani général xen wéygo bilenmu uchrashqan. Hindistan terep uchrishishtin kéyinki resmiy bayanatida “Ikki dölet généralliri rayon ténchliqi, chégra bixeterliki, ortaq herbiy manéwir qatarliq istratégiyelik tesirge ige mesililer boyiche söhbetleshti. Bu yuqiri derijilik herbiy hemkarliqni kücheytish we shundaqla her ikki dölet üchün intayin sezgür bolghan chigraning muqimliqi üchün paydiliq,” dégenlerni bildürgen.

Biraq yuqiriqi hindistan géniralining néme üchün Uyghur élide ziyaretke orunlashturulghanliqi diqqet qozghimaqta.

“Hindistan waqti géziti” ning xewiride Uyghur élining pakistan tewesidiki keshmir arqiliq pakistan'gha chigralinidighanliqini, hindistan'gha tewe bolghan emma xitay teripidin kontrol qilinidighan aqsay chin rayonining mutleq köp qismining Uyghur élidiki xoten wilayiti ichide ikenlikini eskertip ötken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet