Xitay “Bir belwagh bir yol qurulushi” da hindistanning qollishigha érishelmigen

Roytérs agéntliqining xewer qilishiche, seyshenbe küni “Shangxey hemkarliq teshkilati” gha eza döletlerning tashqi ishlar ministirliri béyjingda uchrashqan. Uchrishishtin kéyin herqaysi eza döletler birleshme bayanat élan qilip “Bir belwagh bir yol qurulushi” ni qollaydighanliqini ipadiligen. Emma bu bayanatqa hindistan qol qoymighan.

Pakistan, qazaqistan, qirghizistan, rusiye, tajikistan we özbékistan tashqi ishlar ministirliri bolsa “Bir belwagh bir yol qurulushi” ni qollap imza qoyghan. 

Xewerde éytilishiche, hindistan bash ministiri modi mushu iyunda xitayni ziyaret qilip, shangxey hemkarliq teshkilatining dölet bashliqliri yighinigha qatnishidiken. Bu jeryanda xitay dölet re'isi shi jinping bilen uchrishidiken. 

Gerche bu uchrishishta modining xitay bilen bolghan chégra ixtilapi seweblik yirikleshken munasiwetlirini yumshitishi mumkinliki perez qilin'ghan bolsimu, biraq hindistan tashqi ishlar ministirining bayanatqa qol qoymasliqi hindistanning “Bir belwagh bir yol qurulushi” diki meydanini özgertmigenlikini körsitip bergen. 

“Bir belwagh bir yol qurulushi” qarmiqidiki muhim qurulushning biri bolghan “Pakistan-xitay iqtisadiy karidori” hindistan özige tewelikini ilgiri süridighan keshmir rayonidin ötidighanliqi üchün, hindistan bu qurulushqa qattiq qarshi turup kelmekte. 

Emma, pakistan bash ministiri shahiti xaqan abbasi düshenbe küni qilghan sözide “Pakistan-xitay iqtisadiy karidori” ni “Pakistan'gha tereqqiyat we bayliqning yolini achti” dep maxtap ketken.