Һиндистан армийиси доклам чегра районлиридики қошунлириниң һәрбий һәрикәт һазирлиқини күчәйткән

Мухбиримиз җүмә
2017.08.12
Share on WhatsApp
Share on WhatsApp

Хәвәрләргә қариғанда, һиндистан армийиси хитай билән талаш-тартиш қиливатқан доклам чегра районлиридики қошунлириниң һәрбий һәрикәт һазирлиқини күчәйткән.

Ройтерсниң мәзкур һәрикәттин хәвәрдар үч нәпәр һөкүмәт хадимидин нәқил елип хәвәр қилишичә, һиндистан даирилири мәзкур чеградики җиддийликни улғайтишини халимайдиған болсиму, әмма өз армийисиниң диққәттә туруш дәриҗисини ашурған.

Һиндистан билән хитай арисидики чегра ихтилапи нәччә он йиллиқ тарихқа игә болсиму, бу қетимқиси бу йил июл хитай қурулушчилири һиндистан, хитай вә бутан арисида талаш-тартиш қилиниватқан доклам районидики бир йолни кеңәйтип ясимақчи болғанда башланған.

Һиндистан хитай ишчилириниң бутанда қурулуш қилишни тосуш үчүн бутанға дәрһал қошун йөткигән. Хитай даирилири һиндистанни қошунлирини дәрһал чекиндүрүшкә чақирған болсиму, һиндистан мит қилмиған. 

Шундин бери һәр икки тәрәп бир биригә бой бәрмәй терикишиш давам қилған иди. 

Һиндистан вақит гезитиниң хәвәр қилишичә,  нөвәттә доклам чеграсида һәр икки тәрәптин 300 дин 350 кичә әскәр бир биригә робиро туруватқан болсиму, хитай һөкүмити тибәт һәрбий райониға йәнә 1500 әскәр йөткигән.


Ройтерсниң мәхпийәтлик түпәйли өзини ашкарилашни халимиған һиндистан әмәлдаридин нәқил елип хәвәр қилишичә, бу әмәлдар һиндистанниң шәрқий һәрбий район қоманданлиқ штабидики барлиқ әскәрлиригә бир һәптә илгирила әгәр уруш партлап қалса бәлгиләнгән орунда һәрбий позитсийә игиләш буйруқи берилгәнликини билдүргән.

Һиндистан вә хитай арисидики чегра ихтилапи түпәйли 1962-йили бир қетим қораллиқ тоқунушқан. Әмма чегра ихтилапи та һазирғичә давамлишип кәлгән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.