Һиндистанму бейҗиң қишлиқ олимпик мусабиқсини байқут қилған

Мухбиримиз ирадә
2022.02.03
Share on WhatsApp
Share on WhatsApp

Мәлум болушичә, һиндистанму бейҗиң қишлиқ олимпик мусабиқсини байқут қилғанлиқини елан қилған. Бейҗиң олимпикиниң ечилиш мурасимиға көп сандики ғәрб дөләтлириниң рәһбәрлири қатнашмайдиғанлиқини билдүргән.

Америка хитайниң уйғурларға йүргүзиватқан ирқий қирғинчилиқини нәзәрдә тутуп, бейҗиң қишлиқ олимпик мусабиқисини депломатик бойқут қилидиғанлиқини җакарлиғандин кейин, әнглийә, канада вә австралийәму бу сәпкә қетилған.

Хитай ташқий ишлар министирлиқи юқириқи дөләтләрни “олимпик мусабиқисини сиясийлаштүрди, олимпик мусабиқиси дегән сиясәттин мустәсна болуши керәк” дәп әйиблигән. Һалбуки, “олимпикни сиясийлаштуруш” қа қарши икәнликини билдүрүп кәлгән хитай һөкүмити, 2020-йили 6-айда галван вадисида хитай-һиндистан чегра қоғдаш әскәрлири арисида йүз бәргән қанлиқ тоқунушқа қатнашқан хитай әскирини бу қетимлиқ бейҗиң қишлиқ олимпик мусабиқисиниң мәшәлчиси қилған.

Хитайниң бу һәрикити һиндистанниң қаттиқ наразилиқини қозғиған. Бүгүн, йәни 3-феварал күни һиндистанму хитай олимпикини депломатик бойқут қилидиғанлиқини җакарлиған. Һиндистан ташқий ишлар министирликиниң баянатчиси ариндам бағчи бүгүнки баянатида: “хитайниң олимпикни сиясийлаштурушни таллиғанлиқи кишини толиму әпсусландуриду,” дегән.

Американиң “блумберг гезити” ниң хәвәр қилишичә, 2022-йиллиқ бейҗиң қишлиқ олимпик мусабиқисгә 21 дөләтниң рәһбири қатнишидиған болуп, уларниң мутләқ көп қисми росийә президенти виладимир путин, пакистан баш министири имран ханни өз ичигә алған һакиммутләқ дөләтләрниң рәһбәрлири икән.

Хәвәрдә көрстилишичә, бу нөвәт австирийә, латвийә, голландийә, йеңи зеландийә, шивитсийә қатарлиқ дөләтләр ковид-19 вирусини сәвәб қилип көрситип, рәһбәрлирини әвәтмәйдиғанлиқини елан қилған. Данийә, финландийә вә норвегийә қатарлиқ дөләтләрниң рәһбәрлириму бейҗиң олимпикини ечилиш мурасимиға бармиған.

Америкадики “пев тәтқиқат мәркизи” ниң тәкшүрүшидин мәлум болушичә, йеқинқи йиллардин буян, ғәрб дөләтлиридә хитайға болған иҗабий көз қараш төвәнлигән икән. Ловий институти ақиллар амбириниң директори наташа кассамниң “блумберг гезити” гә билдүрүшичә, “бейҗиңниң кишилик һоқуқ хатириси 2008-йилдики олимпиктин буян зор дәриҗидә чекингән болуп, һазир ғәрбтики җамаәтниң хитай һәққидики қаришиму тарихтики әң төвән нуқтида” икән.

Хитай ташқий ишлар баянатчиси хуа чүнйиңниң елан қилған тизимликкә қариғанда, бейҗиң олимпик мусабиқисигә дөләт рәһбәрлирини әвәткән дөләтләр росийә билән пакистандин сирт, қазақистан, қирғизистан, өзбекистан, түркмәнистан таҗикистан, сәуди әрәбистан, қатар, мисир, камбоджа вә сербийә қатарлиқ дөләтләрни өз ичигә алидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.