Hindistanmu béyjing qishliq olimpik musabiqsini bayqut qilghan

Muxbirimiz irade
2022-02-03
Share

Melum bolushiche, hindistanmu béyjing qishliq olimpik musabiqsini bayqut qilghanliqini élan qilghan. Béyjing olimpikining échilish murasimigha köp sandiki gherb döletlirining rehberliri qatnashmaydighanliqini bildürgen.

Amérika xitayning Uyghurlargha yürgüziwatqan irqiy qirghinchiliqini nezerde tutup, béyjing qishliq olimpik musabiqisini déplomatik boyqut qilidighanliqini jakarlighandin kéyin, en'gliye, kanada we awstraliyemu bu sepke qétilghan.

Xitay tashqiy ishlar ministirliqi yuqiriqi döletlerni “Olimpik musabiqisini siyasiylashtürdi, olimpik musabiqisi dégen siyasettin mustesna bolushi kérek” dep eyibligen. Halbuki, “Olimpikni siyasiylashturush” qa qarshi ikenlikini bildürüp kelgen xitay hökümiti, 2020-yili 6-ayda galwan wadisida xitay-hindistan chégra qoghdash eskerliri arisida yüz bergen qanliq toqunushqa qatnashqan xitay eskirini bu qétimliq béyjing qishliq olimpik musabiqisining mesh'elchisi qilghan.

Xitayning bu herikiti hindistanning qattiq naraziliqini qozghighan. Bügün, yeni 3-féwaral küni hindistanmu xitay olimpikini déplomatik boyqut qilidighanliqini jakarlighan. Hindistan tashqiy ishlar ministirlikining bayanatchisi arindam baghchi bügünki bayanatida: “Xitayning olimpikni siyasiylashturushni tallighanliqi kishini tolimu epsuslanduridu,” dégen.

Amérikaning “Blumbérg géziti” ning xewer qilishiche, 2022-yilliq béyjing qishliq olimpik musabiqisge 21 döletning rehbiri qatnishidighan bolup, ularning mutleq köp qismi rosiye prézidénti wiladimir putin, pakistan bash ministiri imran xanni öz ichige alghan hakimmutleq döletlerning rehberliri iken.

Xewerde körstilishiche, bu nöwet awstiriye, latwiye, gollandiye, yéngi zélandiye, shiwitsiye qatarliq döletler kowid-19 wirusini seweb qilip körsitip, rehberlirini ewetmeydighanliqini élan qilghan. Daniye, finlandiye we norwégiye qatarliq döletlerning rehberlirimu béyjing olimpikini échilish murasimigha barmighan.

Amérikadiki “Péw tetqiqat merkizi” ning tekshürüshidin melum bolushiche, yéqinqi yillardin buyan, gherb döletliride xitaygha bolghan ijabiy köz qarash töwenligen iken. Lowiy instituti aqillar ambirining diréktori natasha kassamning “Blumbérg géziti” ge bildürüshiche, “Béyjingning kishilik hoquq xatirisi 2008-yildiki olimpiktin buyan zor derijide chékin'gen bolup, hazir gherbtiki jama'etning xitay heqqidiki qarishimu tarixtiki eng töwen nuqtida” iken.

Xitay tashqiy ishlar bayanatchisi xu'a chünyingning élan qilghan tizimlikke qarighanda, béyjing olimpik musabiqisige dölet rehberlirini ewetken döletler rosiye bilen pakistandin sirt, qazaqistan, qirghizistan, özbékistan, türkmenistan tajikistan, se'udi erebistan, qatar, misir, kambodzha we sérbiye qatarliq döletlerni öz ichige alidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet