Генерал маноҗ наравани: “биз тоқунуш яки урушта хитай армийәсигә йеңилмәймиз!”

Мухбиримиз әзиз
2022-01-13
Share

Һиндистан билән хитай оттурисидики талаш-тартишта туруватқан ладах райони һәққидики соалларға җаваб бәргәндә һиндистан армийәсиниң баш қомандани, генерал маноҗ наравани өзлириниң һәрқачан хитай азадлиқ армийәси билән “сөһбәт вә тинч усулда мәсилиләрни бир тәрәп қилишни халайдиғанлиқини, навада тоқунуш яки уруш болуп қалса өзлириниң ғалибийәт саһиби болидиғанлиқини” алаһидә тәкитлигән.

“һиндистан вақти” гезитиниң 13-январдики баш мақалисидә көрситилишичә, у өткән 20 айдин буян тоқунуш гирдавида туруватқан ладах районида һиндистан армийәсиниң урушқа тәйяр һаләттә туруватқанлиқини, тоқунуш яки урушниң һеч илаҗ қалмиғанда қоллинилидиған әң ахирқи чарә икәнликини, әмма буниңда өзлириниң ғәлибигә мутләқ ишәнчи барлиқини иптихарлиқ ичидә тилға алған.

Хәвәрдә ейтилишичә, һиндистан-хитай даирилири нөвәттә 14-нөвәтлик һәрбий сөһбәтни башлиған болуп, сөһбәттики бәзи қатмаллиқлар тәдриҗий түгәшкә башлиған. Әмма һазирму һәр икки тәрәп өз алдиға әң илғар қораллар билән қоралланған 50 миңчә әскәрни ладах районида тутуп туруватқан болуп, һиндистан армийәсиниң бу хилдики армийә орунлаштуруш һәрикити аллиқачан ладах районидин һалқип кәткән.

Һиндистанниң хитай билән чегрилинидиған шималий қисим территорийәси асасий җәһәттин мушу хилдики һәрбий орунлаштурушни тамамлап болған. Әмма хитай тәрәпниң талаш-тартиш болуватқан һәмдә һиндистан тәрәп өз територийәси дәп қараватқан җайларда там соқуп өй селиши икки тәрәпниң чегра мәсилисини сөһбәт билән һәл қилишиға еғир тосқунлуқларни пәйда қилмақтикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт