Hindistan taratquliri: “Karachidiki qatilliq xitayning 50 milyard dollarliq qurulush pilanigha xewp ekeldi”

Muxbirimiz shöhret hoshur
2018.02.14

Hindistanning “Bayts xewerliri” namliq bir axbarat orgini bügün “Karachidiki qatilliq xitayning 50 milyard dollarliq qurulush pilanigha xewp élip keldi” mawzuluq bir xewer élan qilin'ghan.

Xewerde 5‏-féwral küni pakistanning karachi shehiride yüz bergen bir neper xitay puqrasini étip öltürüsh weqesining “Xitay-pakistan iqtisadiy karidori” pilanigha körsitidighan tesiri mulahize qilin'ghan.

Xewerde déyilishiche, weqede ölgüchi pakistanda 1994‏-yildin bashlap tijaret qiliwatqan bir xitay shirkitining xojayini bolup, u karachidiki bir bazarda sodiliq qiliwatqan chéghida 9 pay oqqa tutulghan. Xewerde, bu xitay puqrasining küp-kündüzde we ashkara bir bazarda étiwélishi yéqinqi yillarda pakistan'gha köchüp kelgen 20 mingche xitay puqrasining bixeterlikining kapalet astida emeslikining bir ipadisidur, déyilgen.

Xewerde yene ötken yili öktebirde balujistanda ikki neper xitay inzhénérning görüge élin'ghanliqi we axirida öltürülgenliki eslitip ötülgen. Melum bolushiche, pakistan da'iriliri xitay puqralirining mezkur rayondiki bixeterlikini qoghdash üchün 15 ming kishilik alahide qisim teyyarlighan. Emma xewerde bu küchning rayondiki mewjut xewp-xeterni tizginleshke qadir emesliki tekitlen'gen. Bu xewerde yene “Xitayni qorqutuwatqan yene bir xeterlik küch shinjangdiki bölgünchi térrorchilar” dep eskertilgen.

Xewerde déyilishiche, mezkur weqede ölgen xitay puqrasi chén ju ilgiri bir mehel yénida muhapizetchi élip yürgen bolsimu, kéyinche u buningdin waz kechken. Chén juning öltürülüsh weqesidin kéyin xitay da'iriliri öz puqralirini qoghdash heqqide pakistan terepke téximu qattiq tonda gep qilishqa bashlighan.

“Baytis xewerliri” de élan qilin'ghan bu xewerde amérika hökümiti pakistan'gha béridighan bir milyard dollarliq bixeterlik yardimini toxtatqandin kéyin, pakistan köchlirining xitay puqralirining bixeterlikige kapaletlik qilishining téximu qiyinlashqanliqi ilgiri sürülgen. Mezkur xewerde pikir bayan qilghan mutexessisler, nöwette “Xitay-pakistan iqtisadiy karidori” ningla emes, belki xitayning “Bir belwagh, bir yol” qurulushining bixeterlikini qoghdashningmu qéyin'gha chüshidighanliqini, mushu nuqtidin alghanda xitayning bu pilanining meghlup bolush éhtimalliqining zorlighini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.