Һиндистан билән хитай талаш-тартиштики ладақ чеграсиниң икки тәрипидә әскәр көпәйткән

Мухбиримиз әркин
2020-06-22
Share

Һиндистан билән хитай уйғур аптоном райониға чеградаш болған талаш-тартиштики ладақ чеграсиниң икки тәрипидә әскәр көпәйткән. Икки тәрәпниң ладақ чеграсида әскәр көпәйткәнлики америкадики "Planét Leb" ширкитиниң өткән һәптә тартқан сүний һәмраһ сүрәтлиридә ашкариланған. Хәлқара истиратегийә иниститутиниң 18-июн күни билдүрүшичә, "ишәнчлик пакитлар һиндистан-хитай икки тәрәпниң әмәлий чегра контрол сизиқиниң икки тәрипидә әскәрлирини көрүнәрлик көпәйткәнликини көрсәтмәктә" икән.

Хитай әскәрлириниң өткән һәптә ақсайчиндики әмәлий чегра контрол сизиқидин өтүп, һиндистан контроллуқидики йәрләрдә чедир қуруши һиндистан-хитай чегра қисимлириниң тоқунушини пәйда қилған. Таш-тоқмақлар билән болған тоқунушта һиндистанниң 20 әскири өлүп, 70 нәччә әскири яриланған. Лекин хитай тәрәп қанчә әскириниң өлгән вә яриланғанлиқини елан қилип бақмиған. Ройтерс агентлиқиниң билдүрүшичә, бәзи сабиқ һиндистан һәрбий әмәлдарлири хитай тәрәптин 40 тәк әскәрниң өлгәнликини илгири сүргән. Хәлқара истратегийә институтиниң қәйт қилишичә, хитай тәрәп ладақ чеграсидики әскәрлирини бурунқи 500-600 дин һазирқи 1000-1500 гә көпәйткән.

Мәзкур орун йәнә хитайниң җәнубий уйғур районида турушлуқ 6-механиклашқан девизийәсини һәрикәтләндүрүп, чегра тәрәпкә йөткигәнликини илгири сүргән. Лекин хәлқара истратегийә институтиниң тәкитлишичә, икки тәрәп чеграда әскәр көпәйткән болсиму, әмма хитай тәрәп ладақниң әмәлий контрол сизиқиға йеқин җайда қурған чедирлирини йөткәп кәткән. Хәвәрләрдә хитай әскәрлириниң бу җайда қурған чедири икки тәрәпниң өткән һәптидики тоқунушиға сәвәб болғанлиқи илгири сүрүлүп кәлгән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт