Hindistan bilen xitay talash-tartishtiki ladaq chégrasining ikki teripide esker köpeytken

Muxbirimiz erkin
2020-06-22
Share

Hindistan bilen xitay Uyghur aptonom rayonigha chégradash bolghan talash-tartishtiki ladaq chégrasining ikki teripide esker köpeytken. Ikki terepning ladaq chégrasida esker köpeytkenliki amérikadiki "Planét Leb" shirkitining ötken hepte tartqan sün'iy hemrah süretliride ashkarilan'ghan. Xelq'ara istiratégiye inistitutining 18-iyun küni bildürüshiche, "Ishenchlik pakitlar hindistan-xitay ikki terepning emeliy chégra kontrol siziqining ikki teripide eskerlirini körünerlik köpeytkenlikini körsetmekte" iken.

Xitay eskerlirining ötken hepte aqsaychindiki emeliy chégra kontrol siziqidin ötüp, hindistan kontrolluqidiki yerlerde chédir qurushi hindistan-xitay chégra qisimlirining toqunushini peyda qilghan. Tash-toqmaqlar bilen bolghan toqunushta hindistanning 20 eskiri ölüp, 70 nechche eskiri yarilan'ghan. Lékin xitay terep qanche eskirining ölgen we yarilan'ghanliqini élan qilip baqmighan. Roytérs agéntliqining bildürüshiche, bezi sabiq hindistan herbiy emeldarliri xitay tereptin 40 tek eskerning ölgenlikini ilgiri sürgen. Xelq'ara istratégiye institutining qeyt qilishiche, xitay terep ladaq chégrasidiki eskerlirini burunqi 500-600 din hazirqi 1000-1500 ge köpeytken.

Mezkur orun yene xitayning jenubiy Uyghur rayonida turushluq 6-méxaniklashqan déwiziyesini heriketlendürüp, chégra terepke yötkigenlikini ilgiri sürgen. Lékin xelq'ara istratégiye institutining tekitlishiche, ikki terep chégrada esker köpeytken bolsimu, emma xitay terep ladaqning emeliy kontrol siziqigha yéqin jayda qurghan chédirlirini yötkep ketken. Xewerlerde xitay eskerlirining bu jayda qurghan chédiri ikki terepning ötken heptidiki toqunushigha seweb bolghanliqi ilgiri sürülüp kelgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet