Вашингтон почтиси гезити: һиндистан-хитай арисидики чегра кризиси "қораллиқ тоқунушқа хәтәрлик дәриҗидә йеқин"

Мухбиримиз ирадә
2017-08-17
Share

Хитай билән һиндистан арисидики чегра кризисиниң қораллиқ тоқунушқа айлинип кетиш еһтималлиқиниң юқирилиқи мулаһизә қилинмақта. Бүгүн "вашингтон почтиси гезити" дә бу мәсилә һәққидә кәң бир мулаһизә мақалиси елан қилинған болуп, униңға "хитай вә һиндистан һималаяда қораллиқ тоқунушқа хәтәрлик дәриҗидә йеқинлишип қалди" мавзусида бир парчә мақалә елан қилинди.

Мақалидә, пүтүн дуняниң диққити шималий корейә билән америкиниң ядро мәсилисидики мәйданиға мәркәзлишип қалған бир вақитта, һималая тағлирида һиндистан билән хитай җимҗит һалда җиддий бир тиркишиш ичидә туруватқанлиқи вә бу қетимлиқ тиркишишниң һиндистан-хитай арисида 30 йил мабәйнидә көрүлгән әң җиддий бир кризис икәнлики баян қилинған.

Мақалидә ейтилишичә, анализчилар бу кризисни һәр икки дөләтниң геополитикилиқ риқабәтлириниң өткүрлишиватқанлиқиниң ипадиси, дәп қараш билән биргә, униң қораллиқ тоқунушқа айлинип кетиш еһтималлиқиниму юқири дәп қарайдикән.

Бу йил 6‏-айниң 16‏-күни һиндистан-хитай шәрқий чегра линийисидики бутан-тибәт-һиндистан чеграси туташқан җайдики доклам еғизида чегра сүркилиши йүз берип, икки дөләт чегра армийиси бир-бири билән һазирға қәдәр тиркишип туруватқан. Әмма, техи сәйшәнбә күни икки тәрәпниң докламдики сүркилишиниң даириси кеңийип, һиндистан контроллуқидики кәшмирниң ладақ райониға җайлашқан пангоң көли әтрапида икки тәрәп чегра қисимлири бир-биригә таш етишип қаршилашқан иди.

Нөвәттә һәр икки тәрәп, өзиниң урушни биринчи болуп башлиған тәрәп болмайдиғанлиқини билдүрсиму, әмма кәйнигә чекинишниму рәт қилип кәлмәктә. Бир қисим мутәхәссисләр болса, хитайниң һиндистан билән дәталаштики земин мәсилилирини һәл қилмай туруп, "бир бәлвағ, бир йол" истратегийисини йолға қоюшиниң хаталиқини, бу пилан һиндистанниң мәнпәәтлиригә зиян беридиған болғачқа, һиндистанниңму буниңға қарап турмайдиғанлиқини билдүрмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт