Японийә билән һиндистан һәрбий һәмкарлиқини йәниму күчәйтиш һәққидә келишкән

Мухбиримиз ирадә
2017-09-14
Share

Һиндистан билән японийә һәрбий һәмкарлиқни йәниму күчәйтиш һәққидә келишим һасил қилған.

Ройтерз агентлиқиниң хәвиригә қариғанда, бүгүн японийә баш вәзири шинзо абе билән һиндистан баш министири моди икки дөләт арисидики һәрбий һәмкарлиқларни йәниму күчәйтиш һәмдә австралийә вә америка билән болған һәмкарлиқларни давамлиқ зорайтиш һәққидә келишкән.

Ройтерз агентлиқиниң мәзкур хәвиридә бу келишимниң хитайниң асияда күнсайин зорийиватқан тәсиригә қарита ортақ тақабил турушни мәқсәт қилғанлиқи илгири сүрүлгән.

Мәлум болушичә, икки тәрәп елан қилған ортақ баянатта, икки дөләтниң хәвпсизлик җәһәттики алақисини күчәйтишниң интайин муһимлиқини тәкитләнгән. Шуниң билән биргә йәнә бу һәмкарлиқларниң түрлүк юқири техникилиқ һәрбий үскүниләр үстидә ортақ тәтқиқат елип бериш вә икки тәрәп армийилириниң ортақ маневир өткүзүши қатарлиқ саһәләрни өз ичигә алидиғанлиқи билдүрүлгән.

Хәвәрдә дейилишичә, бу йилниң бешида һиндистан хитайни рәнҗитип қоймаслиқ үчүн австралийәниң “төт дөләт ортақ һәрбий маневири” өткүзүш тәлипини рәт қилған икән. Әмма бу нөвәт моди шинзо абе билән көрүшкәндин кейин австралийә вә америка билән болған һәмкарлиқини күчәйтишни қарар қилған.

Шинзо абе мухбирларға қилған сөзидә, “һиндистан билән болған мунасивитимиз адәттики икки дөләт һәмкарлиқидин истратегийилик шериклик дәриҗисигә қарап тәрәққий қилди,” дегән.

Шинзо абе билән модиниң учришишиниң һиндистан билән хитай оттурисидики чегра дәталиши әмдила ахирлашқан бир мәзгилгә тоғра келиши диққәт қозғимақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт