Һиндистанлиқ сиясийон хитайни натсист германийәсигә охшатти

Мухбиримиз җүмә
2020-07-12
Share

Һиндистанлиқ сиясийон хитайниң уйғурларға селиватқан зулумлириниң натсист германийәсиниң барлиқ характерини толуқ намаян қилидиғанлиқини билдүрди.

Һиндистан мәғалая шитатиниң башлиқи татһагата рой "һазирқи вақит хәвәрлири" ториниң зияритини қобул қилип, хитайниң уйғурларға селиватқан вәһшиянә зулумлириниң натсистларниң йәһудий вә җипсий қатарлиқларға қилғанлириға түптин охшайдиғанлиқини билдүрди.

Хәвәрдә көрситишичә, у йәнә хитайниң әркин сода методи билән бирләштүрүлгән бир партийәлик мустәбит һакимийәт болуш сүпити билән натсист германийәсиниң барлиқ алаһидиликлирини өзигә муҗәссәмлигәнликини алаһидә тәкитлиди.

Хитай һөкүмитиниң уйғурларға қарита зулум сиясәтлири дуняви әйибләшләр учриғандин башқа, америка хитай әмәлдарлириға әмәлий җаза тәдбирлири қолланған.

Америка һөкүмити 9-июн хитайниң уйғур елидә йүргүзүватқан бастуруш сиясәтлиригә биваситә мунасивәтлик 4 нәпәр хитай әмәлдариға магниситкй қануни бойичә җаза елан қилған.

Бу әмәлдарлар уйғур аптоном районлуқ парткомниң секретари чен чүәнго, уйғур аптоном районлуқ сиясий-қанун комитетиниң сабиқ секретари җу хәйлун, уйғур аптоном райониниң муавин рәиси, қошумчә уйғур аптоном районлуқ җама'әт хәвпсизлики назаритиниң назири ваң миңшән, уйғур аптоном районлуқ җама'әт хәвпсизлики назаритиниң партком секретари ху люҗүн қатарлиқлардин ибарәт.

Америка ташқи ишлар министири майк помпейо бу һәқтики баянатида юқириқилардин сирт йәнә уйғур елидики зулумда роли бар, дәп қаралған башқа хитай һөкүмәт әмәлдарлириниңму америкиға киришини чәклигәнликини билдүргән.

Америка малийә министири ситивин минучин бу һәқтики баянатида: "америка малийә күчидин толуқ пайдилинип туруп, шинҗаң вә дуняниң һәрқайси җайлирида кишилик һоқуқни дәпсәндә қилғучиларни җавабкарлиққа тартишқа вәдә бериду," дегән.

Америкиниң мәзкур қарари хитайниң уйғурларға қариши нопус қирғинчилиқи елип бериватқанлиқиға аит доклат вә хәвәрләр оттуриға чиқип, җиддий инкас қозғиған мәзгилгә тоғра кәлди. 

Йеқинда германийәлик тәтқиқатчи адриян зенз вә бирләшмә агентлиқи елан қилған мунасивәтлик доклатларда хитайниң уйғур қатарлиқ мусулман хәлқләрниң нопусини чәкләш үчүн уйғур аяллириға мәҗбурий туғут чәкләш оператсийәси қилғанлиқи ашкариланған.

Бирләшмә агентлиқиниң зияритини қобул қилған мутәхәссисләр хитайниң уйғур елидә "аста характерлик ирқий қирғинчилиқ" тәдбирини йолға қойғанлиқини билдүрүшкән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт