Hindistanliq siyasiyon xitayni natsist gérmaniyesige oxshatti

Muxbirimiz jüme
2020-07-12
Share

Hindistanliq siyasiyon xitayning Uyghurlargha séliwatqan zulumlirining natsist gérmaniyesining barliq xaraktérini toluq namayan qilidighanliqini bildürdi.

Hindistan meghalaya shitatining bashliqi tathagata roy "Hazirqi waqit xewerliri" torining ziyaritini qobul qilip, xitayning Uyghurlargha séliwatqan wehshiyane zulumlirining natsistlarning yehudiy we jipsiy qatarliqlargha qilghanlirigha tüptin oxshaydighanliqini bildürdi.

Xewerde körsitishiche, u yene xitayning erkin soda métodi bilen birleshtürülgen bir partiyelik mustebit hakimiyet bolush süpiti bilen natsist gérmaniyesining barliq alahidiliklirini özige mujessemligenlikini alahide tekitlidi.

Xitay hökümitining Uyghurlargha qarita zulum siyasetliri dunyawi eyibleshler uchrighandin bashqa, amérika xitay emeldarlirigha emeliy jaza tedbirliri qollan'ghan.

Amérika hökümiti 9-iyun xitayning Uyghur élide yürgüzüwatqan basturush siyasetlirige biwasite munasiwetlik 4 neper xitay emeldarigha magnisitky qanuni boyiche jaza élan qilghan.

Bu emeldarlar Uyghur aptonom rayonluq partkomning sékrétari chén chüen'go, Uyghur aptonom rayonluq siyasiy-qanun komitétining sabiq sékrétari ju xeylun, Uyghur aptonom rayonining mu'awin re'isi, qoshumche Uyghur aptonom rayonluq jama'et xewpsizliki nazaritining naziri wang mingshen, Uyghur aptonom rayonluq jama'et xewpsizliki nazaritining partkom sékrétari xu lyujün qatarliqlardin ibaret.

Amérika tashqi ishlar ministiri mayk pompéyo bu heqtiki bayanatida yuqiriqilardin sirt yene Uyghur élidiki zulumda roli bar, dep qaralghan bashqa xitay hökümet emeldarliriningmu amérikigha kirishini chekligenlikini bildürgen.

Amérika maliye ministiri sitiwin minuchin bu heqtiki bayanatida: "Amérika maliye küchidin toluq paydilinip turup, shinjang we dunyaning herqaysi jaylirida kishilik hoquqni depsende qilghuchilarni jawabkarliqqa tartishqa wede béridu," dégen.

Amérikining mezkur qarari xitayning Uyghurlargha qarishi nopus qirghinchiliqi élip bériwatqanliqigha a'it doklat we xewerler otturigha chiqip, jiddiy inkas qozghighan mezgilge toghra keldi. 

Yéqinda gérmaniyelik tetqiqatchi adriyan zénz we birleshme agéntliqi élan qilghan munasiwetlik doklatlarda xitayning Uyghur qatarliq musulman xelqlerning nopusini cheklesh üchün Uyghur ayallirigha mejburiy tughut cheklesh opératsiyesi qilghanliqi ashkarilan'ghan.

Birleshme agéntliqining ziyaritini qobul qilghan mutexessisler xitayning Uyghur élide "Asta xaraktérlik irqiy qirghinchiliq" tedbirini yolgha qoyghanliqini bildürüshken idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet