Hindistanning bir axbarat tetqiqat orni Uyghur rayonidiki bir qisim lagérlarning qurulmisi heqqide maqale élan qildi

Hindistandiki “Metbe'e” namliq axbarat tetqiqat orgini 1‏-awghust küni Uyghur aptonom rayonidiki bir qisim lagérlarning qurulmisi heqqide maqale élan qildi.

“Shinjangdiki gulaglar ashkarilinip qaldi” dégen mawzuda élan qilin'ghan bu maqalida yighiwélish lagérlirining qurulmisi sün'iy hemrah arqiliq inchike közitilgen. Maqalida déyilishiche, lagérlar asasen teyyar qurulush matériyalliridin qurashturulghan bolup, qurulush pilani qisqa waqit ichide tamamlan'ghan. Maqalida déyilishiche, lagérlar qurulushliri asasen 4 chasa shekillik bolup, lagérlardin biridiki ikki qewetlik bir binaning uzunluqi 102 métir, kengliki 80 métir iken.

Tutqunlarning yataq binasi ikenliki perez qilin'ghan bu binaning udulida uzunluqi 70 métir, kengliki 15 métir kélidighan 4 qewetlik bir bina barliqi, buning oqutush binasi bolush éhtimalliqi tilgha élin'ghan mezkur maqalida bu binaning her bir qewitide 21 dérize barliqi, bu binaning kengliki 3 métir uzunluqi 6 métirliq 42 siniptin teshkillen'genliki perez qilin'ghan.

Maqalida yene bir lagérning uzunluqi 130métir, kengliki 20 métir kélidighan bir binasining barliqi, buningda az dégende 3000 kishining solinip yatqanliqi ilgiri sürülgen. Maqalida yene lagérlar tutqunlarning tamdin artilip yaki tamni téship qéchishining pütünley aldini élish pilanida layihelen'genliki ilgiri sürülgen. Melum bolushiche, lagérlar ichkiri we tashqiri qorshaw tamlardin tüzülgen bolup, tamlar tikenlik sim bilen 4 métir égizlikte yasalghan iken. 

Maqalida eng chong lagérning qeshqer toqquzaqta ikenliki, bu lagérlarning “Terbiyilesh merkezliri” dégen namda jaza lagéri ornida ishlitiwatqanliqi bayan qilin'ghan.

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar