Hindistanliq yoluchilar shangxey pudong ayrodromida xitay xadimlirining yolsiz mu'amilisige duch kelgen

Muxbirimiz qutlan
2017-08-13

Hindistan bilen xitayning chégra weziyiti künsayin jiddiylishiwatqan bir mezgilde, shangxey arqiliq bashqa xelq'ara hawa liniyisige almishidighan hindistanliq yoluchilarning pudong xelq'ara ayrodromida yolsiz mu'amilige duch kélishi diqqet qozghimaqta.

“Bügünki hindistan” gézitining xewirige qarighanda, 6-awghust küni déhlidin san-fransiskogha qarap uchqan xitay sherq hawa yollirining yoluchilar ayropilani shangxeydiki pudong xelq'ara ayrodromigha qon'ghan. Ayropilandiki yoluchilarning köp qismi hindistanliqlar bolup, ular ayropilan almishidighan chaghda chiqish ishikidiki xitay xadimlarning yolsiz mu'amilisige duch kelgen. Hetta méyiplar harwisidiki hindistanliq yoluchilarmu xitay xadimlarning qopal mu'amilisige uchrap, qattiq bi'aramliq hés qilghan.

Shangxeydiki pudong xelq'ara ayrodromida yüz bergen bu yolsiz weqe hindistanliq yoluchilarning qattiq ghezipini qozghighan.

Yoluchilardin shimaliy amérika penjabliqlar birleshmisining re'isi satnam sing chaxal hindistan tashqiy ishlar ministiri sushma sawarajqa xet yézip, hindistanliq yoluchilarning xitayda uchrighan yolsiz mu'amilisi üstidin shikayet qilghan hemde hindistanliqlarning bundin kéyin xitay hawa yollirining ayropilanigha chiqmasliqini tewsiye qilghan.

U mundaq dégen: “Men ayrodromdiki xitay xadimlarning beden tilidin ularning hindistan bilen xitay otturisida körülüwatqan chégra jiddiychilikini bu yerdimu namayan qiliwatqanliqini hés qildim.”

Halbuki, xitay sherq hawa yolliri bu heqte inkas qayturup, hindistanliq yoluchilarning shikayitini ret qilghan we pudong xelq'ara ayrodromida xitay xadimlarning hindistanliq yoluchilargha yolsizliq qilghanliqidin téniwalghan.

Igilinishiche, xitay hökümiti téxi aldinqi ayda hindistandiki xitay puqralirigha bixeterlik heqqide körsetme bérip, ularning hindistanda ulghiyiwatqan “Xitay öchmenliki” din saqlinishini agahlandurghan.