Hindonéziye ölimalar kéngishi xitayning Uyghurlarni basturushini qattiq tenqid qildi

Muxbirimiz erkin
2018-12-17
Élxet
Pikir
Share
Print

Hindonéziye ölimalar kéngishi meslihetchiler komitétining re'isi 17‏-dékabir bayanat élan qilip, xitayning Uyghurlarni basturushini qattiq tenqid qilghan.

Hindonéziye axbarat agéntliqi antaraning xewer qilishiche, komitét re'isi din shemsuddin xelq'ara taratqularning melumatini neqil keltürüp, "Shinjangdiki Uyghur musulmanlirining ten jazasigha, yekleshke uchrawatqanliqi we islami ehkamlirigha emel qilishi cheklen'genliki" ni tekitligen. U, "Bundaq basturush kishilik hoquq we xelq'ara qanun'gha ashkara xilapliq qilishtur" dégen.

Hindonéziye ölimalar kéngishi hindonéziyening musulmanlargha petiwa béridighan eng yuqiri diniy orgini. U islam ellirining ichide xitayning Uyghurlarni basturushini ashkara tenqid qilghan hökümetke chétishliq tunji islamiy gewdidur. Xitayning 800 mingdin 2 milyon'ghiche Uyghurni yighiwélish lagérlirigha qamap, uning medeniyiti we diniy étiqadini cheklishi gherb dunyasining qattiq tenqidige uchrighan. Emma musulman döletliri hazirgha qeder buninggha süküt qilip kelgen idi.

Antaraning xewer qilishiche, bayanatta din shemsuddin yene dunya islam hemkarliq teshkilati we xelq'ara jem'iyetni Uyghurlarni qoghdashqa, xitay hökümitidin Uyghurlarning kishilik hoquqini qayturup bérishni telep qilishqa chaqirghan.

Bayanatta yene hindonéziye hökümitining xitaygha qarshi mustehkem meydanda turup, Uyghur musulmanlirini qoghdishini, pütün dunyadiki musulmanlarning mumkin bolghan herqandaq yol bilen Uyghur musulmanlirigha yardem bérishini telep qilghan. Biraq, "Jakarta pochtisi" gézitining 17‏-dékabir xewer qilishiche, hindonéziyening mu'awin prézidénti yüsüp kalla ölimalar kéngishining chaqiriqigha inkas bildürüp, hindonéziyening xitayning ichki ishlirigha arilashmaydighanliqini bildürgen.

U düshenbe küni muxbirlargha qilghan sözide: "Elwette biz kishilik hoquqqa qilin'ghan herqandaq depsendichilikni ret qilimiz we buning aldini élishni isteymiz. Halbuki, biz bashqa bir döletning ichki ishlirigha arilashmaymiz" dégen.

Toluq bet