Ataqliq chaqchaqchi hisam qurbanning öy mesilisi téxiche hel bolmighan

Xitay medeniyet ministirliqi ataqliq chaqchaqchi hisam qurban'gha “Dölet derijilik gheyriy medeniyet mirasining wekillik warisi” dep nam bergen. Lékin mezkur namgha érishken hisam qurbanning olturaq öy mesilisi hazirgha qeder hel bolmighan.

“Uyghurbiz” torining xewer qilishiche, hisam qurbanning oghli mexmut hisam bu yil 2‏-ayda mikro blogqa inkas yézip, hisam qurban hazir olturuwatqan öyning mülkiyet hoquqi hel bolmighanliqini bildürgen. Uning inkas qilishiche, yerlik hökümet hazir hisam qurban olturuwatqan öyni öz waqtida uninggha parawanliq namida bérip, axbarat wasitiliride keng teshwiq qilghan.

Hisam akining bu öyde olturuwatqinigha uzun yil bolghan bolsimu, biraq öyning mülkiyet hoquqi uninggha bérilmigen. Buning bilen hisam aka hökümet bergen öyde ijarige olturup kelgen. “Uyghurbiz” torining bildürüshiche, bu xewer torda ghulghula qozghighan bolsimu, biraq yerlik hökümetning bu mesilini derhal hel qilghan-qilmighanliqi melum emesken.

Xitay medeniyet ministirliqi 2010‏-yili Uyghur chaqchiqini gheyriy maddiy medeniyet mirasi, dep qobul qilghan. Hisam qurban 2012‏-yili 12‏-ayda gheyriy maddiy medeniyet miraslirining wekillik warisi, dep élan qilin'ghan idi. Uning guwahnamisini yéqinda yazghuchi memtimin hoshur bilen ghulja sheherlik medeniyet idarisining bashliqi sedirdin, hisam akining qoligha tapshurup bergen.