Holliwudning rézhissori apatof, holliwudni xitayning Uyghur "Qirghinchiliqi" gha süküt qilish bilen eyibligen

Muxbirimiz erkin
2020-09-21
Élxet
Pikir
Share
Print

Holliwudning dangliq filim rézhissori jud apatof holliwudni tenqidlep, xitayning amérika kinochiliq sahesini sétiwalghanliqi, shunga u xitayning Uyghurlarni depsende qilishigha köz yumup kelgenlikini bildürgen. Amérikadiki "Döletlik teqriz" zhurnilining xewer qilishiche, apatof ötken hepte amérika taratqulirigha qilghan bu heqtiki sözide, "Xitay bizning sükütimizni sétiwaldi" dégen. Uning tekitlishiche, amérika kinochiliq sahesi xitay we bashqa döletlerning kishilik hoquq depsendichiliki échip bérilgen kinolarni sénzorlimaqtiken.

Jud apatof hazirgha qeder xitayning Uyghurlarni depsende qilishini ashkara eyiblep, holliwudni tenqidligen tunji holliwud sen'etkari.

"Qiriq yashliq qiz" qatarliq komédiyelik filimlerni ishlep dang chiqarghan jud apatof, disnéy shirkiti yéqinda "Mulen" namliq filimni ishlep tarqatqandin kéyin yuqiriqi bayanda bolghan. "Döletlik teqriz" zhurnilining xewiride qeyt qilinishiche, apatof mundaq dégen: "Bu chong karxanilarning köpinchisi dunyaning her qaysi jayliridiki se'udi erebistan, xitaydek döletler bilen soda qilidu. Ular bu döletlerni tenqid qilmayla qalmay, filimliridimu tenqid qilishqa yaki heqiqet chongqurlap échip bérilgen höjjetlik filimlerni qoyushqa yol qoymaydu".

Uning tekitlishiche, kinochiliq saheside "Héchkim yighiliwélish lagéridin qéchip chiqqan bir ademning hékayisini sétiwélip filimgha almaydiken shundaqla xitayni tenqidleydighan herqandaq idiye süretke élinish basquchidila chiqirip tashlinidiken". "Mulen" namliq filimning bir qisim körünüshlirining Uyghurlargha "Irqiy qirghinchiliq" élip bériliwatqanliqi ilgiri sürülüwatqan Uyghur diyarida élin'ghanliqi ashkarilinip, xelq'arada qattiq ghulghula qozghighanidi.

Toluq bet