Xongkongda medeniyet inqilabi heqqide muhakime yighini échildi

Muxbirimiz ümidwar
2017.01.08


Xitay hökümiti tunji qétim medeniyet inqilabi heqqide muhakime yighini échishni ruxset qilghan bolup, mezkur muhakime yighinini xongkong xitay edebiyati uniwérsitétining xitay tetqiqat xizmet merkizi bilen hazirqi zaman xitay medeniyiti tetqiqat merkizi birliship teshkilligen.

Medeniyet inqilabining 50 yilliqigha béghishlan'ghan mezkur ilmiy muhakime yighinigha xitay we chet'ellerning mexsus medeniyet inqilabi mesililiri üstide tetqiqat qiliwatqan mutexxesiliri qatniship, 160 tin artuq kishi muhakimini anglighan.

Yighinda yene xitay ijtima'iy penler akadémiyisining mutexesislirimu doklat bergen.

Amérika awazining bu heqtiki xewride ilgiri sürilishiche, yéqinqi waqitlarda xitayda medeniyet inqilabi mesililiri heqqide ashkara yosunda muhakime pa'aliyetliri ötküzüsh asasiy jehettin cheklimige uchrighan bolup, hetta bir qanche medeniyet inqilabi dewri heqqide tetqiqat qiliwatqan xitay mutexessisi chet'elde ötküzülgen bu heqtiki ilmiy muhakime yighin'gha qatnishish sepiridin toxtitip qoyulush weqelirimu sadir bolghan iken. Bu qétim, chong quruqluqning idarisi astidiki xongkongda medeniyet inqilabi heqqide mexsus muhakime yighin échishqa ruxset qilish bir tunji ish bolup hésablinidiken.

Mutexessislerning qarishiche, medeniyet inqilabining keltürgen ziyanliri we xatasi xitayda ilgiri köp tekitlen'gen bolsimu, emma inqilabni qozghighan xitay kompartiye rehberliri maw zédong, ju énley we bashqilargha qayta baha bérish hem ularning medeniyet inqilabining arqa körünishidiki we ziyanliridiki roli, orni we bashqa köpligen mesililerde erkin pikir yürgüzüshke izchil chek qoyulup kélin'gen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.