Хоңкоңдики зор намайишта уйғурлар мәсилиси оттуриға чиқти

Мухбиримиз әзиз
2019-06-19
Елхәт
Пикир
Share
Принт

Хитай һөкүмитиниң «қачқунларни өткүзүп бериш» тәлипини чөридигән һалда барғансери юқири пәллигә чиқиватқан хоңкоңдики намайишта тунҗи қетим уйғурлар мәсилиси җанлиқ оттуриға чиққан.

19-Июндин башлап иҗтимаий таратқуларда кәң тарқалған сүрәтләрниң биридин мәлум болушичә, хитай мәркизий һөкүмитиниң хоңкоңдики алақә ишханисиниң алдида намайишчилар уйғур дияридики сиясий вәзийәтни типик әкс әттүридиған сүрәтләрни көтүрүп чиққан. 

Бу сүрәтләрниң биридә уйғур дияридики лагер тутқунлириниң тизилип олтурған көрүнүши берилгән болса қалғанлирида 2009-йилидики «5-июл үрүмчи вәқәси» гә мунасивәтлик рәсимләр һәмдә һасилиқ уйғур аялниң хитай қораллиқ қисимлириниң броневик машинилирини арқиға чекинишкә мәҗбурлаватқан көрүнүши тәсвирләнгән. Намайишчиларниң бу рәсимләрни хитай мәркизий һөкүмитиниң хоңкоңдики алақә ишханисиниң вивискиға чаплимақчи болуватқанлиқи вә хоңкоң сақчисиниң буни тосуп қелишқа аҗиз келиши көплигән кишиләрни ойландурған.

Мәлум болушичә, хитай һөкүмити хоңкоң әдлийә системисини һәрқандақ гумандарни, җүмлидин сиясий өктичиләрни өзлири халиған шәкилдә бейҗиңға өткүзүп беришкә мәҗбурлаватқан болуп, бу уларниң «хоңкоңдики барлиқ түзүмләр 50 йилғичә өзгәрмәйду» дегән вәдисиниң ялған икәнликини көрситип бәргән. Бу қетимқи намайишта уйғур дияри һәққидики сүрәтләрниң оттуриға чиқиши һәққидә сөз қилған бәзи анализчилар «хоңкоңлуқлар бу җайниң уйғур дияриға охшаш сиясий бастуруш билән толған бир макан болуп қелишидин бәкму әндишә қилмақта,» деди.

Пикирләр (0)
Share
Толуқ бәт