Höriyet géziti: 15 ming kélométirliq qéchish yoli

Türkiyening “Höriyet géziti” türkiyening qeysiri shehiridiki Uyghur muhajirlar heqqide xewer bérip, xitayning diniy ibadetni jinayet qatarigha kirgüzüshi, Uyghurlarni köchüshke mejbur qilghanliqini bildürdi.

Xewerde, qeysiri shehirige orunlashqan bezi muhajirlarni ziyaret qilip, ularning sherqiy -jenubiy asiya arqiliq türkiyege qéchish jeryanidiki kechürmishlirini tonushturdi.

Xewerde yene, qeysiri shehirining 1950‏-yillirida Uyghur muhajirlargha bir qétim sahibxaniliq qilghan'ghanliqini eskertip, “Bu qétim xitay hökümitining qanun chiqirip, sherqiy türkistanda diniy ibadetni jinayet qatarigha kirgüzüshi, Uyghurlarni türkiyege köchüshke mejbur qildi” dégen.

Xewerde ilgiri sürüshiche, 15 ming kolométirliq yolni bésip kelgen Uyghurlarning chet'ellik bashqa musapirlardin perqliq bir tere'ipi bar. Chet'ellik musapirlarning nishani türkiye arqiliq yawropagha kétish, biraq Uyghurlargha nisbeten türkiye ularning axirqi békiti.

Xewerde yene, Uyghurlar olturushluq a'ililikler binasigha sherqiy türkistan we türkiyening ikki ghayet chong bayriqi ésilghanliqini eskertip, bir muhajirning “Hazir biz bu yerde ibaditimizni erkin qiliwatimiz” dégen sözlirini qeyt qildi.

Uyghur aptonom rayonluq xelq qurultiyi 2014‏- yili noyabirda qanun chiqirip, ammiwi sorunlarda ibadet qilish we diniy kiyim-kécheklerni kiyishni men'iy qilghan. Xilapliq qilghuchilarning jinayi jawabkarliqqa tartilidighanliqini békitken idi.