Xoten wilayetlik partkomning sékrétari jazagha uchridi

Muxbirimiz ümidwar
2017.08.06

Xoten wilayetlik partkomning sabiq sékrétari jang jinbyaw xotendiki köp qétimliq qarshiliq weqelirining kélip chiqishida mes'uliyiti sürüshtürülüp, délo turghuzulup tekshürülüsh we edliye organlirigha tapshurup bérish jazasigha uchridi.

1996-Yilidin étibaren lop nahiyisining mu'awin hakimliq wezipisidin dawamliq ösüp, ilgiri-kéyin, lop nahiyisi, yeken nahiyisining partkom sékrétari we qizilsu qirghiz aptonom oblastining partiye sékrétarliq wezipilirini atqurghan jang jinbyaw 2016-yilidin 2017-yilighiche xoten wilayetlik partiye komitéti sékrétarliq wezipisidiki waqtida, yeni, bu yil 1-ayda tekshürüsh astigha élinip wezipisidin qaldurulghan idi.

Tengritagh toridiki bu heqtiki uchurdin melum bolushiche, Uyghur aptonom rayonluq partkom jang jinbyawni “Siyasiy intizam we siyasiy qa'idilerge éghir derijige xilapliq qilghan, térrorluqqa qarshi turup, muqimliqni qoghdash siyasiy mes'uliyiti de küch chiqarmay, éghir aqiwet keltürüp chiqarghan” dep eyibligen.

Jang jinbyaw aptonom rayonluq partkom teripidin yene “Xoten wilayiti partkomining birinchi sékrétari bolush süpiti bilen bu jaydiki térrorluqqa qarshi turup, muqimliqni qoghdashtiki birinchi mes'uliyiti bar kishi turuqluq, asasi meqset éngi we mes'uliyet éngi ajiz bolghan, u jaydiki térrorluqqa qarshi turup muqimliqini qoghdash weziyitining qattiq murekkep ehwalda ikenlikige qarimay, partiye merkizi komitéti telep qilghan rayondiki térrorluqqa qarshi turup, muqimliqni qoghdash siyasiy mes'uliyitini ada qilmighan” dep eyiblen'gen. 

Közetküchilerning qarishiche, jang jinbyawning yene bashqa ilgiri jazagha uchrighan xitay emeldarlirigha oxshash parixorluq, chiriklik we istil mesilisimu tilgha élin'ghan bolsimu, emma uning chiriklik we keypi-sapa bilen bolup kétip, ilgiri xoten rayonida yüz bergen köp qétimliq weqelerning aldini almighanliqi, yeni qattiq chare-tedbirlerni qollanmighanliqi uning yiqilishidiki asasliq amil bolghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.