Канада хитайниң хуавей, ZTE ширкәтлириниң 5G тор қурулушиға қатнишишини чәкләйдиғанлиқини елан қилди

Мухбиримиз әркин
2022.05.20
Share on WhatsApp
Share on WhatsApp

Канада һөкүмити хитайниң дуняға даңлиқ икки чоң телефон алақә әсваблири ширкитиниң канада 5G тор қурулушиға қатнишишини чәкләйдиғанлиқини елан қилған. Канада америка, әнглийә, австралийә, йеңи зеландийәдин кейин хитайниң бу икки ширкитини 5G тор қурулушидин чәклигән дөләтләрдин бири болди. Канада санаәт министири франшиос-филип шампәйинниң 19-май мухбирларға канаданиң бу қарари униң көчмә тор мулазимитини яхшилап, “канаданиң аманлиқи вә бихәтәрликини қоғдайдиғанлиқи” ни билдүргән.

Б б с ниң хәвәр қилишичә, хитайниң хуавей ширкити канаданиң қараридин “әпсусланғанлиқи” вә бу қарарниң “сиясий” қарар икәнликини илгири сүргән. Хуавей билән ZTE ширкити хитай һөкүмитиниң астиртин контроллуқидики хитай һәрбий даирилири билән зич алақиси болған америка қатарлиқ дөләтләрниң бихәтәрликигә чоң тәһдит, дәп қарилипла қалмай, улар йәнә хитайниң уйғурларға қаратқан ирқий қирғинчилиқи вә юқири техникилиқ назарәт системисини техника җәһәттин қоллап кәлгән ширкәтләр, дәп қарилип кәлгән.

Канаданиң 19-май хуавей билән ZTE ни чәкләйдиғанлиқини елан қилишидин кейин, бу икки ширкәт америка, әнглийә, австралийә, йеңи зеландийә вә канадани өз ичигә алған “бәш көзләр” намлиқ истихбарат һәмкарлиқ гуруһиға әза дөләтләрниң һәммиси тәрипидин чәкләнгән болди.

Канада санаәт министири франшиос-филип шампәйин 19-май оттавада мухбирларға ейтишичә, бу қарар “бихәтәрлик органлириниң толуқ тәкшүрүши вә әң йеқин иттипақдашлири билән мәслиһәтләшкәндин кейин чиқирилған” икән. У йәнә “биз канадалиқларниң бихәтәрликини һәрқит қоғдаймиз һәмдә телефон алақә ул әслиһәлиримизни қоғдаш үчүн зөрүр болған тәдбирләрни қоллинимиз” дегән.

Ройтерс агентлиқиниң хәвәр қилишичә, хитайниң оттавадики әлчиханисиниң баянатчиси канаданиң бихәтәрлик әндишисини “сиясий монополлуқниң баһаниси” дәп әйиблигән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт