Kanada xitayning xu'awéy, ZTE shirketlirining 5G tor qurulushigha qatnishishini chekleydighanliqini élan qildi

Muxbirimiz erkin
2022.05.20
Share on WhatsApp
Share on WhatsApp

Kanada hökümiti xitayning dunyagha dangliq ikki chong téléfon alaqe eswabliri shirkitining kanada 5G tor qurulushigha qatnishishini chekleydighanliqini élan qilghan. Kanada amérika, en'gliye, awstraliye, yéngi zélandiyedin kéyin xitayning bu ikki shirkitini 5G tor qurulushidin chekligen döletlerdin biri boldi. Kanada sana'et ministiri franshi'os-filip shampeyinning 19-may muxbirlargha kanadaning bu qarari uning köchme tor mulazimitini yaxshilap, “Kanadaning amanliqi we bixeterlikini qoghdaydighanliqi” ni bildürgen.

B b s ning xewer qilishiche, xitayning xu'awéy shirkiti kanadaning qararidin “Epsuslan'ghanliqi” we bu qararning “Siyasiy” qarar ikenlikini ilgiri sürgen. Xu'awéy bilen ZTE shirkiti xitay hökümitining astirtin kontrolluqidiki xitay herbiy da'iriliri bilen zich alaqisi bolghan amérika qatarliq döletlerning bixeterlikige chong tehdit, dep qarilipla qalmay, ular yene xitayning Uyghurlargha qaratqan irqiy qirghinchiliqi we yuqiri téxnikiliq nazaret sistémisini téxnika jehettin qollap kelgen shirketler, dep qarilip kelgen.

Kanadaning 19-may xu'awéy bilen ZTE ni chekleydighanliqini élan qilishidin kéyin, bu ikki shirket amérika, en'gliye, awstraliye, yéngi zélandiye we kanadani öz ichige alghan “Besh közler” namliq istixbarat hemkarliq guruhigha eza döletlerning hemmisi teripidin cheklen'gen boldi.

Kanada sana'et ministiri franshi'os-filip shampeyin 19-may ottawada muxbirlargha éytishiche, bu qarar “Bixeterlik organlirining toluq tekshürüshi we eng yéqin ittipaqdashliri bilen meslihetleshkendin kéyin chiqirilghan” iken. U yene “Biz kanadaliqlarning bixeterlikini herqit qoghdaymiz hemde téléfon alaqe ul eslihelirimizni qoghdash üchün zörür bolghan tedbirlerni qollinimiz” dégen.

Roytérs agéntliqining xewer qilishiche, xitayning ottawadiki elchixanisining bayanatchisi kanadaning bixeterlik endishisini “Siyasiy monopolluqning bahanisi” dep eyibligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet