Икки канада пуқраси өз дөлитигә қайтти, һүсәйин җелилдин һеч хәвәр йоқ

Мухбиримиз җәвлан
2021-09-27
Share

Хуавей ширкити хоҗайининиң қизи мең вәнҗо хитайға қайтуруп берилгәндин кейин, хитай тәрәпму икки нәпәр канада пуқрасини қоюп бәргән болуп, йәң ичидики бу содида хитайниң йәңгәнлики кәң тәшвиқ қилинип кәлмәктә.

"чолпан" (The star) торида икки канадалиқниң ахири өз өйигә қайтип кәлгәнлики, әмма канада пуқраси һүсәйин җелилниң тәқдириниң немә болуп кәткәнликидин һечкимниң кари болмайватқанлиқи һәққидә бир мақалә елан қилинған.

Мақалидә мундақ дейилгән: "майкел кавриң билән майкел спавор 1020 күн түрмидә наһәқ ятқандин кейин өйигә қайтип келип хушал болди. Әмма түрмидә йетиватқан үчинчи канадалиқ немә болуп кәтти? 2006-йилдин бери түрмидә йетиватқан һүсәйин җелилниң қамақтики күнлири униңдин нәччә һәссә көп идиғу?"

Мақалидә ейтилишичә, һүсәйин җелил хитай түрмисидә йетиватқандин бери канаданиң бирәр консолиму уни йоқлап қоймиған. 5 Йил бурун хитай һөкүмити униң аниси вә һәдиси билән болған алақисини үзүвәткән болуп, һазирғичә униң әһвалиниң қандақлиқи, өлүк яки тириклики намәлум икән.

Һүсәйин җелил 2001-йил б д т тәрипидин етирап қилинған мусапирлар қатарида канадаға кәлгән болуп, 2005-йил канада пуқралиқиға өткән. Шу йили у аялини елип өзбекистандики туғқанлирини йоқлиғили барғанда, өзбекистан даирилири уни тутуп хитайға тапшуруп бәргән; хитай униң канада пуқралиқини етирап қилмиған.

Мақалидә көрситилишичә, хитай һөкүмити майкел кавриң билән майкел спаворни тутқун қилғандин кейин, канада таратқулири һәр вақит бу мәсилигә диққәт қилип кәлгән, әмма һүсәйин җелилни унтуп кәткән. Канада һөкүмити әгәр адил болимән дәйдикән, һүсәйин җелилниң из-дерикини қилиши, барлиқ чариләр билән уни қутулдуруп, аяли вә төт балиси билән җәм қилиши керәк икән, шундақ болғанда барлиқ канадалиқларниң көңли арам тапидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт