Кишилик һоқуқ тәшкилатлири канада баш министериниң һүсәнҗан җелилни қутқузушини тәләп қилди

Мухбиримиз әркин
2017-12-01
Share

Хәлқара кәчүрүм тәшкилати билән кишилик һоқуқни көзитиш тәшкилати канада баш министири җастин тредониң хитай зияритидә униң хитай түрмисидики канада пуқраси һүсәнҗан җелил қатарлиқ бәзи сиясий мәһбусларниң қоюп беришигә күч чиқиришини тәләп қилған.

Канада баш министериниң хитай зиярити келәр һәптә башлиниду. Хәлқар кәчүрүм тәшкилати канада шөбисиниң мәсули алекс нәве 29‏-ноябир тередоға язған мәктупида хитай түрмисидики 16 мәһбусниң тизимликини елан қилип, болупму униң һөсәнҗан җелил, фалунгоңчи чйән сүн, вә хитай өктичиси ваң биңҗаңниң мәсилисигә алаһидә көңүл бөлүшини тәләп қилған.

Алекис нәвениң мәктупида мундақ дейилгән: "канада әркин сода келишими арқилиқ хитай билән болған мунасивәтни чоңқурлаштурушни ойлишиватқан бир вақитта халиғанчә тутқун қилинған, қанунсиз қамалған вә хитай түрмилиридә һәр хил кишилик һоқуқ дәпсәндичиликигә дучар болуватқан канадалиқлар вә униңға алақидар кишиләр сиз көңүл бөлидиған муһим мәсилә болуши керәк. Буниң ичидики бәзи делоларға 10 йилдин ашти. Бу кишиләрниң қоюп берилиши үчүн күч чиқиришиңизни күтимиз."

Кишилик һоқуқни көзитиш тәшкилати канада шөбисиниң мәсули фарида дәиф 30‏-ноябир елан қилған мәктупида, теридониң зиярити униң кишилик һоқуқни оттуриға қоюши үчүн муһим пурсәт икәнликини тәкитлигән. Фарида дәиф, хитайниң йеқинда тәйвәнлик паалийәтчи ли миңчини қамақ җазасиға һөкүм қилғанлиқи, өткән һәптә адвокат җяң тйәнйоңниң кесилгәнлики, нобел тинчлиқ мукапатиниң саһиби лю шавбониң аялиниң бу йил 7‏-айдин бери из-дерикиниң йоқлуқини әскәртип, "канада пуқраси һүсәнҗан җелил 10 йилдин бери канада дипломатлири билән көрүшәлмәй өмри хитай түрмисидә өтүватиду," дәп тәкитләнгән. У йәнә теридониң хитайни лю шя вә түрмидики башқа мәһбусларни қоюп беришкә чақиришини, әгәр ундақ қилмиса, буниң хитайға йол қоюп, канаданиң қиммәт қаришиға хиянәт қилғанлиқ болидиғанлиқини билдүргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт