«Вашингтон почтиси» гезитидә 403 бәтлик һөҗҗәтниң «адәмни вәһимигә салидиғанлиқи» тәкитләнди

Мухбиримиз әркин
2019-11-18
Елхәт
Пикир
Share
Принт

«Ню-йорк вақти» гезитидә 16‏-ноябир елан қилинған хитайниң уйғурларни кәң көләмлик тутқун қилип, лагерларға қамаш тоғрисидики мәхпий һөҗҗити дуня таратқулирида зор ғулғула қозғимақта.

Америкадики нопузлуқ гезитләрниң бири болған «вашингтон почтиси» 18‏-ноябир күнидики санида мәзкур һөҗҗәт һәққидә икки парчә мақалә елан қилип, хитай һөкүмитиниң уйғур районида адәмни биарам қилидиған бәзи ишларни қиливатқанлиқи өзлиригә хели вақиттин бери аян болсиму, лекин хитайниң 403 бәтлик мәхпий һөҗҗити униң бастуруш қилмишиға даир һәйран қаларлиқ йеңи дәлилләр билән тәминлигәнликини билдүргән.

«Хитайниң диктаторларчә бастурушиниң һәйран қаларлиқ дәлили» сәрләвһилик мақалидә, гәрчә хитай даирилири өзлириниң һәрикитини йошуруп, бу лагерлар кәспий тәрбийә мәркәзлири, дегәндә чиң турсиму, лекин буниңға уларниң өзиму ишәнмәйдиғанлиқи тәкитләнгән.

Мақалидә қәйт қилинишичә, «ню-йорк вақти» гезити мухбирлириниң өткән һәптә ахири елан қилған хәвири, дунядики истибдат һөкүмәтләрниң бири болған хитайни чүшиниш үчүн қиммәтлик бир роҗәк билән тәминлигән болуп, бу һөҗҗәтләр уларни чөчүтүвәткән. «Вашингтон почтиси» гезитиниң шу күнки санида елан қилинған бир мақалидә болса, уйғур паалийәтчилириниң мәзкур һөҗҗәт һөкүмәтниң уйғур райондики йәрлик хәлқләргә қаратқан «ирқий қирғинчилиқи» ни ашкарилайду, дәп тәнқидлигәнлики тәкитләнгән.

«Шинҗаң һөҗҗәтлири ашкариланғандин кейин уйғурлар вә уларни қоллиғучилар хитай җаза лагерлирини ‹ирқий қирғинчилиқ' дәп әйиблиди» сәрләвһилик мақалидә «ню-йорк вақти» гезитиниң сөзи нәқил кәлтүрүлүп, бу һөҗҗәтниң «хитай коммунистик партийәсиниң йеқинқи нәччә он йиллар мабәйнидә ашкариланған әң муһим ички һөҗҗәтлириниң бири» икәнлики, униң «партийә ичидә уйғур мусулманлирини бастурушқа қарита талаш-тартиш күчийиватқанлиқиниң күчлүк ипадиси» икәнлики тәкитләнгән.

Пикирләр (0)
Share
Толуқ бәт