"Washin'gton pochtisi" gézitide 403 betlik höjjetning "Ademni wehimige salidighanliqi" tekitlendi

Muxbirimiz erkin
2019-11-18
Élxet
Pikir
Share
Print

"Nyu-york waqti" gézitide 16‏-noyabir élan qilin'ghan xitayning Uyghurlarni keng kölemlik tutqun qilip, lagérlargha qamash toghrisidiki mexpiy höjjiti dunya taratqulirida zor ghulghula qozghimaqta.

Amérikadiki nopuzluq gézitlerning biri bolghan "Washin'gton pochtisi" 18‏-noyabir künidiki sanida mezkur höjjet heqqide ikki parche maqale élan qilip, xitay hökümitining Uyghur rayonida ademni bi'aram qilidighan bezi ishlarni qiliwatqanliqi özlirige xéli waqittin béri ayan bolsimu, lékin xitayning 403 betlik mexpiy höjjiti uning basturush qilmishigha da'ir heyran qalarliq yéngi deliller bilen teminligenlikini bildürgen.

"Xitayning diktatorlarche basturushining heyran qalarliq delili" serlewhilik maqalide, gerche xitay da'iriliri özlirining herikitini yoshurup, bu lagérlar kespiy terbiye merkezliri, dégende ching tursimu, lékin buninggha ularning özimu ishenmeydighanliqi tekitlen'gen.

Maqalide qeyt qilinishiche, "Nyu-york waqti" géziti muxbirlirining ötken hepte axiri élan qilghan xewiri, dunyadiki istibdat hökümetlerning biri bolghan xitayni chüshinish üchün qimmetlik bir rojek bilen teminligen bolup, bu höjjetler ularni chöchütüwetken. "Washin'gton pochtisi" gézitining shu künki sanida élan qilin'ghan bir maqalide bolsa, Uyghur pa'aliyetchilirining mezkur höjjet hökümetning Uyghur rayondiki yerlik xelqlerge qaratqan "Irqiy qirghinchiliqi" ni ashkarilaydu, dep tenqidligenliki tekitlen'gen.

"Shinjang höjjetliri ashkarilan'ghandin kéyin Uyghurlar we ularni qollighuchilar xitay jaza lagérlirini 'irqiy qirghinchiliq' dep eyiblidi" serlewhilik maqalide "Nyu-york waqti" gézitining sözi neqil keltürülüp, bu höjjetning "Xitay kommunistik partiyesining yéqinqi nechche on yillar mabeynide ashkarilan'ghan eng muhim ichki höjjetlirining biri" ikenliki, uning "Partiye ichide Uyghur musulmanlirini basturushqa qarita talash-tartish küchiyiwatqanliqining küchlük ipadisi" ikenliki tekitlen'gen.

Toluq bet