Хитай ички орган көчүрүш даирилириниң ватиканға тәклип қилиниши тәнқидкә учриди

Мухбиримиз әркин
2017.02.07

Сабиқ муавин хитай сәһийә министири, хитай ички орган көчүрүш җәмийитиниң башлиқи хуаң җйефу сәйшәнбә күни ватиканда өткүзүлгән йиғинда вәдә берип, мәһбусларниң ички әзалирини мәҗбурий елип көчүрүш қаттиқ җазалинидиғанлиқини билдүргән.

Хуаң җйефу ватикандики йиғинға хитайдики қанун, сәһийә вә аммиви тәшкилатларниң 80 кишилик бир вәкилләр өмики билән келип қатнашқан. У, өз тәшкилатиниң мәҗбурий ички әза көчүрүшкә йол қоймайдиғанлиқини билдүрүп, “бирақ, хитай 1милярд 300милйон нопуслуқ чоң дөләт. Шүбһисизки, қанунға хилап бәзи қилмишларниң болуши турған гәп. Лекин қанунға хилаплиқ қилғанлар болса қаттиқ җазалиниду” дегән.

Хитай һөкүмити 2015‏-йилдин башлап мәһбусларниң ички әзалирини мәҗбурий көчүрүшни тохтитишқа вәдә бәргән. Әмма паалийәтчиләр хитайниң буниңға әмәл қилмиғанлиқини илгири сүрүп кәлгән иди.

Ватиканниң хитай вәкилләр өмикини бу йиғинға тәклип қилиши, хәлқара мәҗбурий ички орган көчүрүшкә қарши дохтурлар җәмийитиниң тәнқидигә учриди. Ройтерсниң хәвәр қилишичә, мәзкур тәшкилат сәйшәнбә күни баянат елан қилип, “хитайда мәҗбурий ички әза көчүрүшниң тохтитилғанлиқиға даир һечқандақ дәлил йоқ” дегән. Бу тәшкилатниң иҗраийә директори торестен трейниң қәйт қилишичә, “очуқ -ашкара болмай туруп, аталмиш бу ислаһатни дәлилләш имкансиз” икән.

Уйғур паалийәтчилириниң билдүрүшичә, хитай һөкүмити мәһбусларниң ички әзалирини мәҗбурий елишни әң бурун уйғурлардин башлиған. Бу 1999‏-йилиға кәлгәндә фалунгуң муритлириға буралған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.