Shangxey hemkarliq teshkilati bashliqlar yighini özbékistanning tashkent shehiride bashlandi

Shangxey hemkarliq teshkilatigha eza rusiye, xitay, qazaqistan, qirghizistan qatarliq döletler bashliqlirining yighini peyshenbe küni özbékistanning tashkent shehiride bashlandi. Bu, mezkur teshkilatning 16-nöwetlik bashliqlar yighini. Xitay re'isi shi jinping seyshenbe küni tashkentke yétip kelgen.

2 Künlük yighinda bixeterlik, térrorluq mesilisi, afghanistan weziyiti, pakistan, hindistan, iran qatarliq döletlerni ezaliqqa qobul qilish qatarliq mesililer muzakire qilinidiken.

Özbékistan mu'awin tashqi ishlar ministiri eniwer nasirof, bu yighinda sh h t ning 2016‏ we 2020‏-yilliq heriket pilani otturigha chiqidighanliqini, heriket pilani siyasiy, iqtisadi, bixeterlik, medeniyet ishliridiki konkrét heriket mizanlirini öz ichige alidighanliqini bildürgen.

Uyghur pa'aliyetchiler sh h t xitayning Uyghurlarni kontrol qilishigha, Uyghur rayonida kishilik hoquqqa buzghunchiliq qilishigha izchil zich maslishiwatqanliqini ilgiri sürüp keldi.

Halbuki, xitay ijtima'iy penler akadémiyesining rusiye‏-ottura asiya tetqiqatchisi li jinféng “Xitay xewerler” gézitige bergen bayanida, sh h t gha eza döletlerning bölgünchilik, térrorluq we diniy radikalliqning tehditige uchrawatqanliqini tekitlep, “Bu yighin bu tehditke taqabil turushni nuqtiliq muzakire qilishi kérek” dégen.

Bu yighinda 2017-yili hindistan bilen pakistanni ezaliqqa qobul qilish qarargha baghlinishi mumkin. Emma peyshenbe küni rusiyening iranning ezaliqini qarargha baghlash teklipi xitayning ret qilishigha uchridi.