Көзәткүчиләр: "хитай компартийәсиниң идеологийә хизмити уйғурларни идийә җәһәттинму қул қилишни мәқсәт қилиду"

Мухбиримиз җәвлан
2021-02-22
Share

"биңтуән гезити" ниң 22-феврал чиқарған хәвиригә қариғанда, уйғур аптоном районлуқ парткомниң муавин секритари, биңтун парткоминиң секритари ваң җүнҗең биңтуән идеологийә хизмити рәһбәрлик гурупписи йиғини ачқан болуп, идеологийә хизмитиниң хитай компартийәсиниң әң муһим хизмәтлиридин бири икәнликини тәкитлигән һәмдә күчни мәркәзләштүрүп, йеңи дәвр сотсиялизм идийәсини йетәкчи қилип, пүтүн сәп бойичә тәшвиқат хизмитини яхши ишләшни тәләп қилған.

Хәвәрдә уйғур районидики идеологийәлик күрәшниң узун муддәтлик, мурәккәп вә җапалиқ болидиғанлиқи алаһидә көрситилгән болуп, "һәр милләт хәлқи кадирлири вә аммисиниң җуңхуа миллити ортақ еңини бәрпа қилиш, вәтән еңи, хитай еңи, хитай мәдәнийити, хитай компартийәси вә хитайчә сотсиялизм еңини күчәйтиш; дөләт еңи, пуқралиқ еңи, қанун еңини мустәһкәмләш" қатарлиқлар идеологийәлик хизмәтниң муһим һалқиси дейилгән.

Көзәткүчиләрниң қаришичә, идеологийә хизмити һәқиқәтән хитай компартийәсиниң әң муһим хизмити болуп, уйғур районидики идийиви хизмәт мисли көрүлмигән зораванлиқ вә күчлүк тәшвиқат орунлири арқилиқ елип берилмақта. Хитай һөкүмити бир яқтин қорқутуш, бир яқтин қизиқтуруш усули билән уйғурларни әнәниви етиқадтин пүтүнләй ваз кечип, атезимлиқ дуня қараш вә хитай мәдәнийити бойичә яшашқа сәпәрвәр қилмақта. Бу арқилиқ бир яқтин уйғурларниң етиқад вә яшаш шәклини пүтүнләй өзгәртишкә урунса, бир яқтин уларниң хитай билән охшаш тәрәққиятта яшаватқанлиқини тәшвиқ қилип, уйғур районидики қәбиһ җинайәтлирини йошуруп кәлмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт