Közetküchiler: "Xitay kompartiyesining idé'ologiye xizmiti Uyghurlarni idiye jehettinmu qul qilishni meqset qilidu"

Muxbirimiz jewlan
2021-02-22
Share

"Bingtu'en géziti" ning 22-féwral chiqarghan xewirige qarighanda, Uyghur aptonom rayonluq partkomning mu'awin sékritari, bingtun partkomining sékritari wang jünjéng bingtu'en idé'ologiye xizmiti rehberlik guruppisi yighini achqan bolup, idé'ologiye xizmitining xitay kompartiyesining eng muhim xizmetliridin biri ikenlikini tekitligen hemde küchni merkezleshtürüp, yéngi dewr sotsiyalizm idiyesini yétekchi qilip, pütün sep boyiche teshwiqat xizmitini yaxshi ishleshni telep qilghan.

Xewerde Uyghur rayonidiki idé'ologiyelik küreshning uzun muddetlik, murekkep we japaliq bolidighanliqi alahide körsitilgen bolup, "Her millet xelqi kadirliri we ammisining jungxu'a milliti ortaq éngini berpa qilish, weten éngi, xitay éngi, xitay medeniyiti, xitay kompartiyesi we xitayche sotsiyalizm éngini kücheytish؛ dölet éngi, puqraliq éngi, qanun éngini mustehkemlesh" qatarliqlar idé'ologiyelik xizmetning muhim halqisi déyilgen.

Közetküchilerning qarishiche, idé'ologiye xizmiti heqiqeten xitay kompartiyesining eng muhim xizmiti bolup, Uyghur rayonidiki idiyiwi xizmet misli körülmigen zorawanliq we küchlük teshwiqat orunliri arqiliq élip bérilmaqta. Xitay hökümiti bir yaqtin qorqutush, bir yaqtin qiziqturush usuli bilen Uyghurlarni en'eniwi étiqadtin pütünley waz kéchip, at'ézimliq dunya qarash we xitay medeniyiti boyiche yashashqa seperwer qilmaqta. Bu arqiliq bir yaqtin Uyghurlarning étiqad we yashash sheklini pütünley özgertishke urunsa, bir yaqtin ularning xitay bilen oxshash tereqqiyatta yashawatqanliqini teshwiq qilip, Uyghur rayonidiki qebih jinayetlirini yoshurup kelmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet