Ijtima'iy alaqe wasitiliride pikir bayan qilghan Uyghurlar tutqun qilin'ghan

Xitay da'iriliri “5-Iyul weqesi” ning 4 yilliq harpisida uqturush chiqirip, ijtima'iy alaqe wasitiliride pikir bayan qilghanliqi ilgiri sürülgen Uyghurlarni tutqun qilghanliqini bildürdi.

Hökümet uchurlirigha qarighanda, bu kishiler ösek söz tarqatqan bolup, bularning ichide bir qisim xitaylarmu bar iken.

Melum bolushiche, uqturushni ürümchi teshwiqat bölümi chiqarghan bolup, uqturushta mundaq déyilgen: yéqinda wang jyenyü, gülbostan ghulam qatarliqlar tor we yanfonda uchur yollap, beyge meydani, yamaliq téghi qatarliq rayonlarda térrorluq weqesi yüz bergenliki heqqide ösek söz tarqatqan.

Uqturushta yene, bu kishilerning qanun boyiche bir terep qilin'ghanliqi körsitilgen we kishilerni ösek söz tarqatmasliq heqqide agahlandurghan.

Radi'oyimizning igilishiche, nöwette ürümchining jenubidiki Uyghurlar topliship olturaqlashqan rayonlar qattiq közitish obyéktigha aylan'ghan, mektep we hökümet organliri qatarliq jaylargha köplep esker orunlashturulghan.

Melum bolushiche, xitay hökümiti qeshqerdimu chong kölemlik tekshürüsh herikiti qozghap nurghun ademni qolgha alghan. Nöwette Uyghur xelqi muqimliq saqlash xizmitide nuqtiliq tekshürülüsh obyéktigha aylan'ghan.