Jenubi koréye: “Shimal bilen kélishim tüzülgen teqdirdimu amérika armiyesi chékinmesliki kérek”

Muxbirimiz shöhret hoshur
2018.05.02

Bügün jenubi koréye prézidénti mon jéy'inning bayanatchisi, “Jenub bilen shimal ikki terep arisida tinchliq kélishimi imzalan'ghan teqdirdimu jenubi koréyediki amérika armiyesining koréye yérim arilidin ayrilmasliqi kérekliki” ni éytqan.

Roytérus agéntliqining bu heqtiki xewiride bayan qilinishiche, prézidént mon jéy'inning meslihetchisi aldinqi künlerde bir maqale élan qilip, shimal bilen jenub arisida tinchliq kélishimi imzalan'ghandin kéyin amérika armiyesining jenubiy koréyediki mewjutluqining qanuniy asasi yoqaydighanliqini ilgiri sürgen.

Muxbirlarning bu maqalige munasiwetlik so'allirigha jawab bergen bayanatchi kim éyyum, amérika armiyesining koréye yérim arilidiki dawamliq mewjudiyitining zörürlükige xitaydin kélidighan tehditni isharet qilghan. U bu heqte “Amérika bizning ittipaqdishimiz, shunga shimal bilen kélishim tüzülgendin kéyinmu bizning xitay we yaponiye bilen bolghan munasiwetlirimizde amérika yenila yarashturghuchiliq rolini oynishi kérek,” dégen.

Shimaliy koréye yillardin béri özining yadrosizlishishining shertliridin biri süpitide amérika armiyesining araldin chékinishini otturigha qoyup kelgen. Emma ötken heptidiki ikki terep dölet rehberlirining tarixiy uchrishishi we qoshma bayanatida amérika armiyesining chékinish mesilisi tilgha élinmighan. Melum bolushiche, nöwette koréye yérim arilida amérikining 28500 kishilik réntgén mewjut iken. Bu mewjutluq koréye urushi axirlashqan 1953‏-yilidin bashlap dawam qilip kelmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.