Xitay hökümiti Uyghur rayonida atalmish “Ma'aripni zamaniwilashturush” toghriliq 2 chong pilanni élan qildi

“Tengritagh” torining 24-iyun bergen xewirige qarighanda, xitay hökümiti Uyghur rayonida “2035-Yilighiche ma'aripini zamaniwilashturush” we “Ma'aripni zamaniwilashturushni tézleshtürüsh pilani” qatarliq ikki pilanni élan qilghan. Xewerde déyilishiche, 2035-yilighiche bu pilani toluq emelge ashurush pilanlan'ghan iken.

Xewerde 2019-yilining axirigha qeder Uyghur rayonida bashlan'ghuch mekteptin burunqi balilar ma'aripigha oqughuchi qobul qilish omumiy nisbitining 97. 51 Pirsentke yetkenliki alahide tilgha ilin'ghan.

Xewerde yene yéqinqi yillardin buyan Uyghur rayonidiki yesli ma'aripi üchün xitay ölkiliridin 140 mingdin artuq xitay oqutquchi qobul qilin'ghanliqi bildürülgen.

Közetküchiler xitay hökümiti 97 pirsenttin köprek omumlashturghanliqini ilgiri sürüwatqan Uyghur diyaridiki yesli ma'aripida ata-aniliri lagérlargha qamalghan nechche yüz minglighan Uyghur yétim balilirining “Xitayche ma'aripta terbiyeliniwatqanliqi”, ularning “Milliy kimliki” we “Diniy kimliki” din yiraqlashturuliwatkanliqini ilgiri sürmekte.

“Nyu-york waqti géziti” 17-mart mexsus maqale élan qilip, xitay hökümitining Uyghur diyaridiki Uyghur we bashqa türkiy milletlerning tili, medeniyiti, étiqadi we kimlikini yoq qélish üchün “Yataqliq mektep” lerni köpeytkenlikini ilgiri sürgen idi.