Xoten shehirige qarashliq arghol kentide 2 saqchi öltürülgen

14‏-Aprél, xoten shehirining laskoy yézisigha qarashliq arghol kentide hijapliq 2 Uyghur ayalgha zorawanliq qilghan 2 neper yardemchi saqchi öltürülgen.

D u q bayanatchisi dilshat rishitning ilgiri sürüshiche, düshenbe küni sa'et 6‏ lerde, 2 neper yardemchisi saqchi hijapliq 2 neper Uyghur ayalni toxtitip, ulardin hijapni chiqirishni telep qilghan, biraq ayallar saqchining buyruqini kishilik erkinlikke qilin'ghan yolsizliq dep qarap ret qilghan.

Dilshat rishit, yardemchi saqchilarning buningliq bilen toxtap qalmighanliqini, ular bu 2 ayalni teqib qilip, öyige qeder egiship barghanliqini bildürdi. Uning ilgiri sürüshiche, saqchilarning herikiti a'ile bashliqlirining qattiq naraziliqini qozghighan. Ikki terep arisidiki talash-tartish netijiside, 2 neper er öy igisi bu 2 saqchini pichaqlap öltürgen.

Dilshat rishit, Uyghur ilidiki nurghun qanliq weqelerni saqchilarning bu xil zorawanliq herikiti keltürüp chiqiriwatqanliqini agahlandurup, da'irilerni puqralarning diniy erkinlikige hörmet qilishqa chaqirdi.

Dilshar rishitning bildürüshiche, weqedin kéyin bu 2 kishi qéchip ketken. Da'iriler ikki hijapliq ayalni qolgha alghan hem weqe yüz bergen rayonni qamaq qilghan. Qéchip ketken 2 Uyghurning ismi hazirghiche éniq emes. Yerlik da'iriler bundaq bir weqe yüz bergenlikini delillimidi. Lékin dilshat rishit, yerlik da'irilerning qéchip ketken 2 kishi heqqide tutush buyruqi chiqarghanliqini bildürdi.