Уйғур диярида ахбаратни қаттиқ қамал қилиш, "икки йүзлимичи" ләргә давамлиқ зәрбә бериш тәкитләнгән

Мухбиримиз ирадә
2018-01-18
Share

Хитай һөкүмити уйғур елида идеологийә саһәсидики күрәшни йәниму күчәйтип, "икки йүзлимичи" ләргә давамлиқ зәрбә беришни тәкитлигән.

"шинҗаң гезити", "йәр шари вақти гезити" қатарлиқ хитайдики һөкүмәт гезитлириниң хәвәр қилишичә, 16 сентәбир күни уйғур ели даирилири тәшвиқат бөлүм башлиқлири йиғини чақирип, бу йил ичидә уйғур елида сиясий идийә вә тәшвиқат хизмитини давамлиқ күчәйтиш, ахбарат вә тор таратқулирини қаттиқ башқуруш шундақла "икки йүзлимичи" ләрни қезип чиқириш арқилиқ идеологийә саһәсидики күрәшниң ғәлибисини қолға кәлтүрүшни тәкитлигән.

"шинҗаң гезити" ниң хәвиригә қариғанда, йиғинға қатнашқан җу хәйлун қатарлиқ хитай рәһбәрлири сөзидә "барлиқ саһәләрдики яман нийәтлик идийәләрни тазилаш вә идеологийә саһәсидики "икки йүзлимичи" ләрни давамлиқ қезип чиқип, зәһәрлик от, зәһәрлик өсмиләрни қәтий тазилаш,"  дегән ибариләрни қолланған.

"йәр шари вақти гезити" ниң хәвиридә, бейҗиңдики мәркизи милләтләр университетиниң шйоң күншүн исимлик бир хитай профессориниң сөзини нәқил кәлтүрүлүп, "‹икки йүзлимичи' ләрниң ағзида сотсиялизм дәп қоюп, көңлидә йошурунчә бөлгүнчиликни яқлайдиған вә һәтта уни қоллайдиған кишиләр икәнлики" ни илгири сүргән. Хәвәрдә йәнә уйғур елида идеологийә саһәсидики күрәштә ғәлибә қилиш үчүн чоқум ахбарат-таратқу васитилирини башқурушни күчәйтиш, болупму интернет торини қаттиқ башқуруш керәклики баян қилинған.

Чәтәлләрдики уйғур көзәткүчиләр, уйғур елида нөвәттә асасий қатламдики уйғурларла әмәс, бәлки тонулған уйғур зиялийлириниңму охшашла "ов нишани" ға елиниватқанлиқини, 2018-йили уйғур диярида сиясий вәзийәтниң йәниму күчийидиғанлиқини илгири сүрмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт