Uyghur diyarida axbaratni qattiq qamal qilish, “Ikki yüzlimichi” lerge dawamliq zerbe bérish tekitlen'gen

Muxbirimiz irade
2018.01.18

Xitay hökümiti Uyghur élida idé'ologiye sahesidiki küreshni yenimu kücheytip, “Ikki yüzlimichi” lerge dawamliq zerbe bérishni tekitligen.

“Shinjang géziti”, “Yer shari waqti géziti” qatarliq xitaydiki hökümet gézitlirining xewer qilishiche, 16 séntebir küni Uyghur éli da'iriliri teshwiqat bölüm bashliqliri yighini chaqirip, bu yil ichide Uyghur élida siyasiy idiye we teshwiqat xizmitini dawamliq kücheytish, axbarat we tor taratqulirini qattiq bashqurush shundaqla “Ikki yüzlimichi” lerni qézip chiqirish arqiliq idé'ologiye sahesidiki küreshning ghelibisini qolgha keltürüshni tekitligen.

“Shinjang géziti” ning xewirige qarighanda, yighin'gha qatnashqan ju xeylun qatarliq xitay rehberliri sözide “Barliq sahelerdiki yaman niyetlik idiyelerni tazilash we idé'ologiye sahesidiki “Ikki yüzlimichi” lerni dawamliq qézip chiqip, zeherlik ot, zeherlik ösmilerni qet'iy tazilash,”  dégen ibarilerni qollan'ghan.

“Yer shari waqti géziti” ning xewiride, béyjingdiki merkizi milletler uniwérsitétining shyong künshün isimlik bir xitay proféssorining sözini neqil keltürülüp, “‛ikki yüzlimichi‚ lerning aghzida sotsiyalizm dep qoyup, könglide yoshurunche bölgünchilikni yaqlaydighan we hetta uni qollaydighan kishiler ikenliki” ni ilgiri sürgen. Xewerde yene Uyghur élida idé'ologiye sahesidiki küreshte ghelibe qilish üchün choqum axbarat-taratqu wasitilirini bashqurushni kücheytish, bolupmu intérnét torini qattiq bashqurush kérekliki bayan qilin'ghan.

Chet'ellerdiki Uyghur közetküchiler, Uyghur élida nöwette asasiy qatlamdiki Uyghurlarla emes, belki tonulghan Uyghur ziyaliyliriningmu oxshashla “Ow nishani” gha éliniwatqanliqini, 2018-yili Uyghur diyarida siyasiy weziyetning yenimu küchiyidighanliqini ilgiri sürmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.