Aqtu nahiyesi ma'arip sahesidiki “Ikki yüzlimichi” lerni pash qilish heqqide uqturush tarqatqan

Aqtu nahiyesining hökümet tor bétide élan qilin'ghan bir uqturushta bayan qilinishiche, da'iriler mekteplerdiki oqutquchilar arisida dersni xitayche sözlimigenlerni pash qilishni telep qilghan we ularning “Ikki yüzlimichi” qatarida bir terep qilinidighanliqini uqturghan.

“Ma'arip sépidiki ikki yüzlimichilerni qet'iy qézip chiqirayli” namliq mezkur uqturush aqtu nahiyelik partkom intizam tekshürüsh komitéti teripidin chiqirilghan. Uqturushta ma'arip sépidiki atalmish “Ikki yüzlimichi” ler özini melum qilishqa chaqirilghan we undaq bolmighanda éghir jazalinidighanliqi heqqide tehdit sélin'ghan. Uqturushta yene “Ikki yüzlimichi” lerni bilip turup pash qilmighanlarningmu jazalinidighanliqi bildürülgen.

Muhajirettiki Uyghur közetküchiler mezkur uqturushni Uyghur rayonida dawam qiliwatqan “Yépiq terbiyelesh lagérliri” gha adem toplash dolqunining bir parchisi dep qarimaqta. Norwégiyediki Uyghur közetküchi zümret xanim, dersni xitayche sözlimigen oqutquchilarni jazalash heqqidiki bu uqturushni “Uyghur rayonida yolgha qoyuluwatqan atalmish ‛qosh tilliq ma'arip‚ ning mahiyette xitaylashturush ma'aripi ikenlikining yene bir ispati,” dep körsetti.

Xitay da'iriliri yillardin béri atalmish “Qosh tilliq ma'arip” ning Uyghur tilini yoq qilishni meqset qilghanliqini inkar qilip kelgen idi. Xitay tashqi ishlar ministirliqining bayanatchisi aldinqi heptidiki bir bayanatida Uyghur rayonida “Yépiq terbiyelesh lagérliri” ning mewjutluqighimu köz yumuwalghan idi.