Aqtu nahiyelik da'iriler ammidin saqchi qoshuni ichidiki "Ikki yüzlimichi" lerni pash qilishni telep qilghan

Muxbirimiz qutlan
2017-06-26
Élxet
Pikir
Share
Print

Bu yil kirgendin buyan aqtu nahiyesi öz tewesidin zor türkümde yardemchi saqchi, bixeterlik xadimi we charlash saqchisi qobul qilipla qalmastin, belki yene xitay ölkiliridin yuqiri ma'ash we teminat bilen nechche yüzligen "Térrorluqqa qarshi alahide saqchi" qobul qilghan idi.

Aqtu nahiyisi yéngidin qobul qilin'ghan bu zor türkümdiki saqchi qoshunining pamir égizlikidiki chégra boyliri we ahaliler rayonlirining muqimliqini saqlaydighanliqini bildürgen idi.

Aqtu nahiyelik hökümet toridin melum bolushiche, nahiye da'iriliri 6-ayning 18-küni ammigha omumiy uqturush chiqirip, saqchi qoshuni ichidiki "Ikki yüzlimichi" lerni pash qilishni telep qilghan.

Mezkur uqturushta pash qilish obyéktining nahiyelik saqchi idarisige qarashliq barliq saqchi xadimlirini, shu jümlidin yardemchi saqchilarni öz ichige alidighanliqi eskertilgen. Pash qilish mezmunida atalmish "Ikki yüzlimichi" yaki "Ikki yüzlimichiler guruhi" gha chétishliq saqchilarni pash qilishni birinchi orun'gha qoyghan.

Uqturushta yene "Hökümet pash qilghuchilarning kimliki we shexsiy bixeterlikini kapaletke ige qilidu, eger pash qilghuchidin öch élish qilmishliri bayqalsa ularni qanun boyiche qattiq jazalaydu," déyilgen.

Közetküchiler, bu ehwal xitay da'irilirining özliri qobul qilghan saqchilargha, bolupmu Uyghur saqchilargha bolghan ishenchining yoqluqini ashkarilap béridu, dep qarimaqta.

Toluq bet